Sunday, 29 December 2013

ZANEDO Life style Beauty Box - December

السلام عليكم 



عوده للتدوين اشتقت له رجعت اليوم بتدوينه عنZANEDO Life style Beauty Box 

لشهر ديسمبر وهالمره دقو علي بالوقت الصح ولا كان فيه اي تاخير وصل لي البوكس بتاريخ ٢٢ 


نشوف محتويات هالشهر 




لوشن للجسم من باث ان بودي شوب بريحه الخيار والبطيخ 
توب كوت من ماركه سيش فيت 
سامبل شامبو وبلسم من فليب بي 
وسامبل من كول وي 






-انا احب منتجات باث اند بودي شوب بس ماعمري فكرت اشتري شي بالفاكهه لاني مااحب هالنوع من الروايح 
احب الثقيله عود ومسك ومن هالاشياء ، ريحه هاللوشن رائعه بجد من فتحت العلبه وانا اشمها وجا على بالي انه من الشامبو

بس ابد طلع من اللوشن ريحه خفيفه وجميله وحلوه اللي مايحب الشي الثقيل .

- توب كوت من seche Vite اسرع توب كوت للاطافر بسرعه ينشف هذا حسب اللي اشوفه واسمعه من خلال 
اليوتيوب انا ماجربته للامانه بس الكل يمدح فيه وسعره ب ٤٥ درهم . 

- شامبو وبلسم من PHILIP B ماعمري جربت هالماركه وحلو انه نجرب شي جديد 
بس الشامبو خالي من الصوديوم والاشياء المضره للشعر ، بس فيه قلتر وبكميه كبيره يعني المفروض انه يعطي لمعه 
زي مامكتوب على العلبه بس اللي اشوفه انها لمعه قليتر وواضحه في العلبه . 
وسعر الشامبو الحجم العادي ب ٣٩٥ درهم .

- واخر شي كريم للوجه او للعيون من كول وي ومكتوب عليه انه لليل بس بحثت عن هالماركه والمنتج نفسه ماعرفت غير
انه كريم للكولاجين بس للاسف ماحصلت عنه اي معلومه اضافيه .


البوكس هالشهر حلو وماشي حاله بس كنت اتمنى انهم يرفقون مع كل علبه ورقه وفيها تفاصيل للمنتجات 
وبرسل لهم هالاقتراح ان شاء الله .


وهنــــا تلاقون بوكس شهر نوفمبر 

Monday, 16 December 2013

Review Telescopic Carbon Black Mascara


Review  Telescopic Carbon Black Mascara  


السلام عليكم 





كم فتاه تعشق مكياج امها ؟ 
انا وحده منهم طبعا ، من فتره كنت ارتب الميك اب بغرفه الوالده وشفت هالماسكرا عندها وسالتها عنها
قالت لي انها جديده ومااستخدمتها واذا ابيها اخذها ، طبعا طبعا اخذتها 

على الكم الهائل بالسوق من ماسكرات لوريال الا اني مااذكر اني شريت اي ماسكرا منهم فشي جيد اجرب 
شغله جديده علي . 



العلبه انيقه على شكل تلسكوب ، لونها اسود لامع ومزينه بحروف ذهبيه .
النوع اللي معاي هو كاربون بلاك يعني السواد الفاحم وفعلا سواد فاحم .



شكل الفرشه جديد علي ماقد استعملت ماسكرا بهالشكل ، فرشه من البلاستك المرن وجدااا بعد ، 




وهالشي يعني انها قادره توصل لاقصر رمش ومثاليه للرموش السفليه . 

ومكتوب بعد على العلبه انها تعطي طول للرموش " اكستريم " يعني الاقصى . 


ولاول مره احس احد يصدق بشي فعلا تعطي طووووول بعمنى طوول للرموش وحبيت هالشي جدا 
احط طبقتين ورموشي طويله وباقي لها شوي وتوصل للحاجب ، فعلا فعلا تعطي طول للرموش وتفرق رمش عن رمش

بس لاحظت اذا زدت اكثر من طبقه تبدا تتكتل وهالشي ماحبيته ، بس مالاحظتو اني ماجبت سيره اي فوليوم حجم للرموش

فعلا هالماسكرا ابدا ابدا ماتعطي اي حجم للرموش ، يعني افضل اني احط ماسكرا تعطي حجم وبعدها هذي 
وتكون الرموش خياليه ، هذا بالنسبه لي انا 

بس ممكن اللي تبحث عن ماسكرا بس للطول بنصحها في هذي ، اما للحجم ف لا طبعا . 

وممتازه للرموش السفيه توصل لكل رمش ويطلع شكلها حلو وبريء .

تقيمي لها ٤ من ٥  

ونقصت رقم لانه ماتعطي حجم للرموش .


Friday, 13 December 2013

ZANEDO Life style Beauty Box - November


السلام عليكم 

من كم يوم وصلت لي هالعلبه وقد تكلمت عن هالشركه في بوست سابق تقدرون تطلعون عليه 

..

طبعا وصلت لي متاخره ودخلنا في ديسمبر ولا جابوها وكلمتهم واعتذرو 
وعوضوني بعلبه غير 

نشوف محتوياتها 


كلها ميك اب من elf وانا ماقد جربت شي من هالماركه 

المحتويات وحسيتها قليله مقارنه باول علبه 

علبه ظل مع فرشه للعيون - لب قلوس - ٣ الون من الكحل السائل 




حبيت الالوان وانا احب الالوان الترابيه ، ولحد الحين ماجربتها على العين ولا اعرف ثباتها بس كالوان حلوه 






القلوس لونه حلو في العلبه بس جربته جدا خفيف يعني لون مورد للشفايف بشكل خفيف جدااا 
وحلو فوق اي روج ، بس شوي دبق 



٣ الوان لحكل سائل
يعني ماحبيتهم حيل ، وسائلين بزياده وماينشف بسرعه ، يعني ممكن يحوس لك الميك اب كله 
البني لونه برونزي او بني فاتح جدا ، والفضي ممكن استخدامه للوك غريب 



هذا كل اللي كان بالبوكس ، يعني تميت يكون فيه اكثر بس نشوف بوكس شهر ديسمبر شلون بيكون 


وشكرا لكم 

Friday, 6 December 2013

Review : Loreal Extraordinary Oil


السلام عليكم 

مراجعه زيت لتجميل الشعر من لوريال
Review : Loreal Extraordinary Oil



زيت للشعر من لوريال متكون من ٦ زيوت مستخلصة من زهور نادرة 
زيت ممكن استخدامه بشكل يومي او بعد كل شور خفيف جدا وغير دهني ، ريحته حلوه .

فيه نوعين منه النوع اللي معاي وهو لجميع انواع الشعر ، وفيه نوع للشعر المصبوغ ولون العلبه احمر .

ممكن استخدامه على الشعر الرطب او الجاف ، انا افضله على الشعر الرطب احطه على شعري 
من نهايه اذني الي نهايه الشعر وازيد الكميه شوي على الاطراف بحكم انه اطراف شعري جافه والفروه دهنيه
فابد مااقربه على الفروه ، بس ممكن اللي شعرها جاف ينفعها خصوصي انه مو دهني ابدا 
فماراح يزيت شعرها . 

وممكن استخدامه كزيت للشعر كامل قبل الشور ، بس انا بصراحه ماجربت هالطريقه ومكتفيه فيه بعد الشور 
لانه يعطيني نتيجه حلوه وعاجبتني . 

تاثيره جميل جدا على الشعر يعطي لمعه حلوه حيويه وصحيه .
انا اشتريته في فبراير و الحين احنا في ديسمبر وعلى قد استخدامي له بعدي ماوصلت الى نص العلبه تقريبا 
وصلت الى عند كلمه جديد ، المنتج اقتصادي جدا ويطول معاك ، فنقطه تحسب له . 

العلبه جدا جميله وانيقة مصنوعه من الزجاج ، بس طبعا العيب الوحيد في المنتج هو لانه زجاج وصعب التنقل فيه بالسفر .

سعر العلبه تقريبا = ٤٤ درهم .

Wednesday, 4 December 2013

الحيـاه الصحيـه ٣

السلام عليكم 


نرجع لهالسلسله الجميله اللي بديتها وهي الحياه الصحيه 

واحب اعترف في البدايه اني هالايام مااعرف وش فيني متلخبطه او كسوله بمعنى ثاني 

احتاج لدافع جديد وخطه جديده لكسر كل النظام والروتين اللي انا عايشه فيه 
عشان ماامل من شي 

رحت لمراجعتي للتغذيه مثل كل شهر .. وهالشهر الوزن ثابت ٦٩.٢ كيلو 
نفس الشهر اللي فات .. طبعا الحمدلله على كل شي بس ممكن هالشي حبطني زياده اني مانزلت شي 
مع اني عارفه اني بوصل لهذي المرحله ويبتدي عندي ثبات الوزن .. 

بس فرحت بشي من خلال الميزان الرقمي اللي عندهم انه نزلت في الدهون كيلو وهذا شي ممتاااااااز جدا 
و زدت حجم العضلات الى كيلو ايضا ، وهذا ممتااااز جدا ، لانه بين اني العب رياضه واثقال 
ومهم جدا انه حجم العضلات يزيد بالجسم عشان الدهون تقل ويزيد معدل الحرق .. 

وسالتها اذا ممكن اغير اكلي او اقلل كميته ، ابد مانصحتني بهالشي لاني احتاجه مع زياده العضلات 

وان شاء الله خير ، اهم شي اني في الطريق السليم .. 

وحددت لي هدف وان شاء الله اوصله .. بنهايه شهر مارس ٢٠١٤ يكون وزني ٦٥ كيلو 

هالرقم هدفي وان شاء الله اقدر وبحاول اقرب منه ولو شوي انا راضيه ، المهم والاهم انه بطريقه صحيه 
وبحياه صحيه اولا واخيرا ، لاني ابي صحتي .


هالايـام احاول ازيد كميه الماء اللي اشربه ، كوب كبير على الريق ، وهالشي شقد اقول انه مفيد 
ينظف القولون والكبد و لاحظت انه بشرتي احلى هالفتره وهالشي انا حابته وبشده 

..


هالشهر انا خلصت كل الفيتامينات اللي عندي وصراحه ودي اوقف هالفتره 
واعتمد على اكلي ، وودي اصفي جسمي من اي نوع حبوب ، اكل فاكهه وخضار بشكل يومي 
واسوي لي عصير اخضر ، ومعروف بفوايده  

والعصير اللي اعتمده انا شبه يومي ( تفاحه - ٣ خيار - ليمونه - زنجبيل فرش -٣ اعواد كرفس او سلاري - وساعات احط بقدونس ) 


..

صور لبعض الاشياء اللي اكلها 




بسكوت طعمه حلو قريب من طعم بسكوت الشاي واخف بكثير من الدايجستف اللايت .. البسكوته الوحده فيها ٣٦ كالوري فقط .. بالنسبه لي افضل اكله من اكل الدايجستف والسعرات اقل .. وسعره ١٥ درهم موجود بس في ( سبينس - وويتروس ) . 




رايس كيك .. ماادري شلون اشرح هالشي بس هو عباره عن دائره من الرز البني خفيفه جدا 
وطعمه قريب الى البوب كرون .. انا اخذت النوع اللي مافيه ملح ، وفيه انواع كثيره من هالماركه شي لوفات وشي عادي 

الحبه الوحده فيها ٣٠ كالوري .. انا احب اكلها ساده او احط عليها شوي لبنه لايت و زعتر او ممكن جبن ابيض مع زيتون 
او مسحه خفيفه من البيستو مع شريحه حلوم مشويه .. مع كوب شاي ياسلام احلى سناك خفيف ويشبع . 





شابوره من امريكانا ، احب الشابوره عموما واكلها الصباح اذا مالي نفس اسوي فطور من قلب تشبع 
هالنوع حلو وقليل بالسعرات وافضل شي لقيته بالسوق لحد الان .. هالنوع بالذات .. اللي مكتوب عليه Rich Rusk ، لانه امريكانا عندها كثير انواع ، بس ابحثو عن هالنوع ، وفيه منه زي مااخذت انا بالحبوب المتكامله او قليل الدسم ويكون لون العلبه ارزق وفيه نوع ثالث اتوقع اسمر ، مااذكر بصراحه بس دايم اخذ هذا او الازرق ،  وهذا فيه ٤٣ كالوري  للكيس الواحد ، والكيس فيه ٣ حبات شي جيد 

موجود ب كارفو وسبينس والسعر مااذكر بس مو غالي . 




نجي لهذا الشي اللي وقعت في غرامه ، دايم اشوف باليوتيوب وعموما الاجانب ياكلون شبس من الخضار 
بس ماالاقي هالشي عندنا ، وفجأه شفته وجربته ، فعلا لذيذ وجدددداااا وعن نفسي اجيبه كمكافأه لي ، الكيس صغير والكميه معقوله بس شوي عاليه بالسعرات يعني الكيس كله فيه ٤٣٠ كالوري 

هذا الموجود الان وبظل ابحث الى الاقي عن شي يشبه وبسعرات اقل 
بس حلو انه من فتره لفتره ادلل نفسي فيه .. سعره ب ٩ دراهم موجود ب سبينس وجيان 







نجي للكوفي انا انسانه عاشقه للكوفي بشكل مجنون يعني قبل كنت اشرب ٤ اكواب يوميا 
بس حاليا كوب واحد باليوم وساعات مااشرب ، فحلو التقدم اللي وصلت له ، وجربت كثير انواع غير نسكافيه 
لانها تزعجني جدا معدتي ماترتاح لها ابد .. فجبت هذي ومعدتي تقبلتها ، النوعين حلوين 
هالعلبتين ممكن تجلس معاي شهرين الى ٣ شهور بحكم اني مااشرب كل يوم ، وساعات اشرب قهوه ساده 
فيعني حبيت احط هالشي للي يعاني مثلي من نسكافيه 




والسعرات معقوله بس الدهون عاليه بصراحه بس من فتره لفتره نقول جيده وافضل من نسكافيه بمراحل .. 


...

هذا كل اللي في جعبتي حاليا وان شاء الله تستفيدون من تجربتي 
وفي كل متابعه للسلسله بصور اشياء جديده واحطها وتكون مرجع للكل 



Tuesday, 3 December 2013

Haul - مشتريات

السلام عليكم 

مشتريات بسيطه وبعضها من فتره فحبيت اجمعهم في بوست 

اول شي من صيدليه بوتس مسوين عروض حاليا 
اشتري واحد وتاخذين الثاني مجانا 




شفت العرض موجود على الشامبو الجاف .. واستغليت هالفرصه .. خصوصي انه شعري دهني 
واحتاج هالشي .. 
اول مره اخذ اللي عليه دانتيل ريحته حلوه ، والثاني اللي فيه لون بني اخذته عشان لون شعري وقد جربته من قبل
وحللو معاي .. 
سعره ب ٣٥ درهم 
..




منظف للفرش من سيفورا بجد روعه ب ٣٨ درهم 

قطرات للعيون رفرش ارتاح عليها كثير خصوصي مع العدسات واحب استخدمها بعد يوم طويل 
اكون لابسه فيه العدسات او بعد يوم اكون حاطه فيه ميك اب للعيون وثقيل .. يريح العيون 
وسعر القطرات ب ١٨ درهم ومتواجده بكل الصيدليات .. 

مناديل مزيله للمكياج جديده واول مره اخذها .. ومكتوب انها للبشره الحساسه 
وهذا اهم شي عندي .. وسعر المناديل تقريبا ٢٢ درهم 

..



معجون للاسنان من كرست للمعان طبيعي على كلامهم  حبيت اجربه 

علبه لتبيض الاسنان ودايم اشوفها في اليوتيوب وتستخدمينها لمده ٥ دقائق فقط 
بجربها واكتب رايي بعد التجربه ،، سعر العلبه ٣٧ درهم 

غسول للفم والاسنان من اورال بي ، من الشركات اللي اثق بمنتجاتهم 
واول مره اخذ هالنوع كل مره اخذ للي لون الغسول اخضر .. والسعر مااذكر صراحه بس ابد مو غالي 

..


هذي كل مشترياتي هالفتره 
ولي عوده بمشترياتي من الميك اب 

...


Sunday, 1 December 2013

November Empties

السلام عليكم 


منتجات خلصتها في شهر نوفمبر 





...

نبدا 




من اليمين 
سامبل مكون من تونر وكريم للوجه من محل ذا فيس شوب .. جدا حلو وناعم ومرطب للبشره 
وهذا ثاني سامبل اخلصه لنفس هالمنتج ..

فيتامين البايوتين الرائع .. تكلمت عنه اكثر في موضوع الفيتامينات اللي اخذها موجود بالمدونه .. خلصته وشي اكيد برجع اشتريه ..

لصقات للانف لازالت الرؤوس السودا .. هالماركه حليوه تشيل شي خفيف جدا .. فمااتوقع اني بشتريها مره ثانيه 

شامبو من نزيه لتساقط الشعر .. هالمنتج بسوي عنه ريفيو قريب مع الانبولات لتساقط الشعر .. رائعييين 
خلص وشريت منه مره ثانيه .. 

..




قطن لتونر ولمسح الميك اب .. حلو حبيته كبير ويشيل الميك اب ..

محلول عدسات جديد بس للاسف انتهت صلاحيته .. لاني البس عدسات شفافه وملونه.. وكل مااشتري عدسات ملونه يعطوني محلول جديد فتراكمت عندي المحاليل وجيت استخدمه واكتشف انه صلاحيته انتهت فياليت اللي مثلي ينتبه على التاريخ ..

معجون اسنان من بارودونتكس ..هو معجون اساسه ملح وتشوفون فيه حبيبات صغيره من الملح .. انا عندي مشكله باللثه شوي ضعيفه وكل ماافرش اسنانسي تكرمون يطلع دم خفيف فاخذت هالمعجون لانه مناسب للثه .. وفعلا مااعاني حاليا من هالمشكله .. بس اللي مابرجع اشتريه لانه خلى اسناني حساسه بزياده .. خصوصي مع المشروبات البارده .. 

سيروم الشعر من لوريال .. هالمنتج اللي مااعرف اعيش بدونه .. ماادري يمكن ٧ او ٨ علبه اخلصها من حبي له ..
انا شعري ويفي والشعره نفسها ناعمه .. احب احط منه وشعري مبلول يعطيني تموجات ناعمه وحلوه كاني سويت شعري بالفير .. احبه 


..




سيروم للشعر من صيدليه بوتس روعه وحبيته لشعري .. وريحته حلووووه ..

مقشر للوجه وجاني هديه ومااعررف من وين صراحه .. ناعم جداا على الوجه انا مااحب المقشرات القويه لانه بشرتي حساسه .. وهذا ناسبني .. 

شرايح شمع للوجه من فيت .. استخدمهم ل الشنب .. وحلوين .. وهالفتره افكر بالليزر للوجه ابي ارتااااح ..


...



مجموعه سامبلز خلصتهم .. عندي علبه كبيره متروسه من السامبلز ابي اخلصهم بصراحه ..

من فوق منتج جديد من لوريال على كلامهم يحارب جلسات الليزر في العنايه .. مااقدر اعطيه تقييم لاني جربت عينه وحده 

من لانكوم بعد منتج جديد وحاليا فيه منه بالسوق .. عن نفسي حبيته هو فيه لون وتختارين درجه لونك .. 
لازم اقرا عنه اكثر عشان اقيمه ..

قطره رفرش للعيون مااستغني عنها .. دايم معاي بالشنطه .. مريحه جدا بعض اي ميك اب بالنسبه لي لانها تريح عيوني 

ماسك ترطيب من كلارنس .. حبيييته حبيته حبيته .. وودي اشتريه .. بس عندي منه سامبلز حوالي ٧ .. بخلصهم وافكر جديا اني اشتريه .. 

روج من ماركه اوفس سامبل وحبيته لانه ماااات مات مات .. ومايطلع بسهوله .. وانا آحبب هالنوعينه 


..


هذي كل الاشياء اللي خلصتها في هالشهر 

وشكرا لكم 

Tuesday, 19 November 2013

خـلـفـيه مـجـانـية Freebies | Wallpaper



مساء الخير 

اليوم بعد ماشربت قهوتي قلت ليش مااصمم شي وسويت خلفيه 

وان شاء الله تعجبكم 








Review Clinique High Impact Extreme Volume Mascara

السلام عليكم 


مراجعه لماسكارا من كلينك .. Clinique High Impact Extreme Volume Mascara


نادر جدا اني ارجع اشتري نفس الماسكرا اللي شريتها من قبل وكل مره ابحث عن شي غير ماجربته 
وهالمره وقع الاختيار على هالماسكرا من كلينك .. انا رموشي متوسطه الكثافه و طولها حلو وزاد طولها من بعد مااستخدمت منتج مافالا

وسويت عنه ريفيو هنا بالمدونه تقدرون تشوفونه .. فصرت ابحث عن الكثافه اكثر ابي اي ماسكرا تعطيني حجم كبير وكثيف .. 



وشفت هالماسكرا ومكتوب عليها اكستريم جربتها عندهم واعجبتني جدا .. 
تعطي كثافه وطول حلو .. وكل ماحطيت طبقه صارت احلى .. والماسكرا سائله يبي لها حذر وقعت الاستخدام عشان ماتلطخ ويبي لها وقت تشوي عشان تجف  .. بس النتيجه روعه وعن نفسي حبيتها ..

زي ماتشوفون بالصوره شعيرات الفرشه من البلاستك .. وحتى بنهايه الفرشه فيها شعيرات
حلوه لاطراف الرموش وجدا حبيت هالخاصيه .. بس ماانصح فيها للرموش السفليه لانها كفرشه كبيره 
وتوصل للعيون وقت الاستخدام .. 


التقييم : ٤ونص من ٥ 
السعر : ١٤٥ درهم 
مكان الشراء : باريس غاليري فرع مردف ستي سنتر 

Friday, 15 November 2013

ملابس اعجبتني

السلام عليكم

هذا اول بوست لي عن الفاشن
لي فتره ابحث بالمواقع او حتى بالسوق عن اشياء جديده وغريبه
وانا لبسي اما يكون قطعه غريبه او شي كلاسيك واضيف له اكسسوار يلفت النظر

وخصوصي بعد جسمي ماتغير وصرت انحف حاليا احاول اغير من ستايلي والبس اشياء جديده علي

شفت هالموقع ولقيت قطع حلوه بشاركم فيها

..
Find out latest women fashion clothing at PersunMall.com

Find Out Latest Women Fashion Clothing At PersunMall.com


....


بليزر ناعم ب ٩٥ ريال
..

وهذا بليزر غريب ويونيك .. وسعره ب ٣٢٣ ريال
..


فستان بسيط وانيق بنفس الوقت ب ٢٦٦ ريال
..


انا اي شي فيه دانتيل يقتلني ولا اقدر اقاومه هالشي خطير جدا ب ٣٨٠ ريال
..


حلق اعجبني خصوصي انه كل وحده شكل ويناسب اذا الشعر كيرلي وعلى جنب ب ١١٨ ريال
..

اسواره اعجبتني جدا تنفع للارم كاندي ب ١١١ ريال
..


الموقع حاليا فيه عروض حلوه الى تاريخ ٣٠ / ١١ /٢٠١٣



(1) 10% OFF $100+ Free shipping on all orders
Promo Code: thanks10 

(2) 15% OFF $150+ Free shipping on all orders
Promo Code: thanks15

(3) 20% OFF $200+ Free shipping on all orders
Promo Code: thanks20 




PersunMall Promo Codes For Thanksgiving Day


رابط الموقع : www.persunmall.com




Thursday, 14 November 2013

فطور في قهوه ماديلين دبي مول - Breakfast at Madeleine Cafe Dubai Mall

السلام عليكم 

حبيت اكتب اليوم عن شي غير 
احب اروح اماكن جديده واجرب اشياء غير هنا في دبي 

ومن فتره شوي طويله وقعت في حب هالكافيه الفرنسي الرايق 
وزيارتي له ٣ مرات وكلهم لفطور صباحي 

كافيه فرنسي اسمه ماديلين في الدور الثاني من دبي مول
يطل على النافوره وجلساته حلوه سواء الداخليه او الخارجيه 
وبال٣ زيارات كان اختيارنا الجلسات الداخليه 




المكان جميل جدا جدا ورايق وبعيد عن الازعاج و اغاني فرنسيه رايقه 

وللاسف ماصورت الديكورات كل شي فيها فرنسي بحت 

بعد ماتختارون طلباتكم يجيبون سله خبز فرنسي مع زبده و عسل ومربى 


وانا هالفقره مو صحبه معاها لاني مااكل عسل ولا مربى بس الخبز حلو والخبز الفرنسي معروف بروعته 

وبعدها بشوي يجيبون المشروبات  وهذا العيب فيهم يجيبونها بسرعه والاكل شوي يتاخر 
فاللي يحب ياكل ويشرب بنفس الوقت مشكله بالنسبه له لانه الكوفي بيكون بارد 


جربت من عندهم الموكا يعني حلوه بس بالزيارات الثانيه اخذت قهوه امريكيه روعه روعه روعه تدخل بالراس 
احب القهوه الساده واذا جت وفوقها رغوه او فقاعات صغيره من القهوه نفسها هنا اعرف انها تمام التمام 

...


وهنا اطباق الفطور 

اول طبق هذا الحبيب والعشق  كرواسون محشي بيض مع جبن خياااااااال خيال اصلا البيض عندهم شي ثاني
من احلى الاماكن اللي اكلت فيها بيض على الفطور 

احب الكرواسون اللي يجي ناشف ولا اشوف الزبده مبقعه بالصحن وهذا تماااام 
والبطاطس روعه كآنها زبده 

في ال ٣ زيارات اخذت نفس الطبق من روعته 
ومو ناويه اغير بصراحه 

وفي كل الزيارات اعجب البنات اختي وبنات خالاتي 

المكان روعه والخدمه ممتاااازه سريعين بالتجاوب وعينهم سريعه الملاحظه 

واكيد برجع لهم في اي وقت .