Wednesday, 30 October 2013

L'Oreal Skin Perfection 3 in 1 Micellar Solution

السلام عليكم 

ريفو سريع لمنتج جميل من لوريال 

L'Oreal Skin Perfection 3 in 1 Micellar Solution






منتج جميل جدا من لوريال وانا وحده احب هالماركه وأثق فيها 
خصوصي انها ماركه عالميه وذات جوده عاليه باسعار معقوله 

منظف ومزيل للمكياج خاص بالبشره الحساسه 
استخدمته على العيون وجدا ممتاز ماحرق لي عيني ابدا خصوصي انه عييوني وبشرتي حول العين حساسه جدا
فهالشي جدا مناسبني 
وجربت استخدمه للوجه والشفايف جدا ممتاز 
وممتاز للماسكرا 

سعره ٣٦ درهم 
والحجم : ٢٠٠ ملي 
ومده الاستخدام من بعد الفتح : ٦ شهور فقط 
ومكان الشراء من السوق الحره بمطار دبي 
بس للاسف مو موجود في دبي بحثت عنه بكذا مكان مالقيته ابدا 
يعني بس بالسوق الحره او اللي حاب يطلبه من بره 


مقارنه بينه وبين بايوديرما




المقارنه منتجين من شركتين مختلفتين يعطون نفس النتيجه بالضبط 
بالنسبه لي انا ماحسيت باي اختلاف ابدا
وجيت اقارن باني امسح كل عين بمنتج واشوف الاختلاف مافيه فرق 
كثير
بس شفت انه لوريال يشيل الماسكرا اسرع 


والاختلاف الثاني 
طبعا بالسعر 

لوريال ٢٠٠ ملي ب ٣٦ درهم 
وبايودرما ٥٠٠ ملي ب ٨٩ درهم 

واتوقع ال ٢٠٠ ملي من بايوديما ب شي و٦٠ درهم مو متاكده بصراحه لاني دايم اشتري
الحجم اللي بالصوره 

الاختلاف الثالث 

منتج لوريال مده استخدامه من بعد الفتح ٦ شهور 

اما بايوديما ١٢ شهر 



بالنسبه لي هل برجع اشتري هالمنتجين ايه نعم 
اذا لقيت لوريال باخذه بس اذا مالقيته بالسوق برجع اشتري بايودرما

وشكرا




Tuesday, 29 October 2013

Healthy LifeStyle -- الحـياة الصحيـة ١



سلسله الحياه الصحيه ١ 




بسم الله الرحمن الرحيم 

مثل ماوعدتكم اني ان شاء الله بسوي هالسلسه 
امس كان موعدي مع اخصائية التغذية والحمدلله فيه نتائج حلوه 


وزني كان : ٦٩.٨ كيلو 
وحاليا: ٦٩.٢ كيلو 

صح مانزل كثير بس الحمدلله راضيه بالقليل 


هالشهر انا مريت باشياء كثيره ممكن هي اللي قللت من خساره الوزن
كانت عندي مواعيد كثيره اسنان وفيشل وغيره 
وكان العيد واهلي موجودين فالطلعات كثيره والروتين شوي يهتز 

بس الحمدلله فوق كل هذا فيه خساره بالوزن 

الوزن اللي خسرته هو ٦٠٠ غرام 
بس بين على جسمي اكثر وخصوصي الخصر والبطن 

وباخر اسبوعين من هالشهر بديت اتدرب مع مدربه بالنادي 
لمده ساعه الى ساعه ونص 

----

شكل جسمي ؟

كمثرى وهو بكل صراحه معاناه وخاصه باللبس نحيف من فوق وسمين من تحت في منطقه الارداف 
وخصر صغير 
تقريبا اغلب لبسي تنانير او بناطلين لازم اضبط الخصر لانه دايم كبير 

يعني حاليا البس قياس ١٢- ١٤ من فوق
وتحت ١٤-١٦ وغالبا ١٦ بس هدفي في الفتره الجايه البس ١٤ … 

---

التمارين ؟

ماحبيت اتكلم عن التمرين بدون صور ف جبت صور من النت توضح التمرين كامل عشان يكون بشكل واضح ومفهوم 
تقريبا هذي التمارين اللي سويتها مع الاجهزه 


هالتمرين جميل جدا للذراع كامله 
اسوي هالتمارين ٢٠ مره كل تمرين ٢٠ مره 

--

هالتمرين ممتاز جدا يشتغل على العضله الزند نفسها وبتحسين بألم وقتها وزياده يشغل عضله الفخذ بنفس الوقت 

---


وهالتمارين جدا ممتازه وساعات نسويها بالكلاسات بالنادي 
بس اذا عندك اثقال بالبيت حلو سويها وبالعدد المكتوب او جيبي علبتين ماي وعبيهم رمل وتصير لك اثقال 

والتمرين هذا ممتاز لعضله الزند و للاكتاف 
--


---

الاكل ؟

بتكلم عنه ببوست لحاله لانه طويل .. وبعض السناكات او الاشياء اللي اكلها حاليا
مخلصه ف يبي لي اروح للسوبر ماركت واصور واجي اعرض واتكلم ببوست شامل ان شاء الله 

---

معلومه ؟

٥ مشروبات تساعدك في خساره الوزن ؟
[ شاي غير محلى اسود او اخضر - الماء - القهوه السوداء - حليب خالي الدسم - عصير الخضار ]

بتكلم عن حبي للقهوه بجميع اشكالها 
احب دائما اذا كنا في كوفي شوب اطلب موكا بس حاولت اغير شوي
صرت اطلبها بحليب خالي الدسم منها اقلل مقدار الفات او الدسم ومنها استمتع بقهوتي بدون مااخذ سعرات مالها لزمه
والطعم عن جد مايفرق وعندي احلى بحليب خالي الدسم تكون خفيفه ولذيذه 

وللي يحبون الكوفيات الدسمه ترى التغيير حلو انتي في النهايه تبين طعم القهوه مو باقي النكهات 
يعني كريما و كاراميل وغيره 

التغيير حلو ومطلوب وتغيير عادات صغيره = تغير الارقام على الميزان

مافيه شي مستحيل نصيحتي حبي نفسك واعطيها حب لانها جوهره ثمينه تستاهل اغلى ماعندك 

---

Sunday, 27 October 2013

فيـتاميـناتـي



السلام عليكم 

حابه اتكلم عن الفيتامينات اللي اخذها 
خصوصي بعد مانزلت من وزني تقريبا ٢٤ كيلو 

طبعا اولا الحمدلله على الصحه والعافيه بس خلال هالفتره جسمي
وشعري وبشرتي تاثرو جدا خلال هالنزول و زياده على هالشي 
اكتشفت بعد فحص الدم انه عندي فيتامين دال و الكالسيوم نازلين جدا

والحمدلله خلصت كورس علاج الفيتامين دال و الكالسيوم ورجع لمستواه الطبيعي.

وفي نفس الوقت كنت اخذ هالفيتامينات اللي بتشوفونهم بالصوره تحت 




من اليمين دائما وابدا 

فيتامينات كامله او ملتي فيتامين يعوض اي نقص واخذ منه حبه وحده باليوم 
وبعد وجبه يفضل وجبه الفطور 
وسعره ٧٨ درهم 

والثاني فيتامين E ومعروف بفوايده للبشره 
وبعد حبه وحده لليوم وبعد وجبه 
وسعره ٩٩ درهم 

والثالث والاخير هذا الحب 
بايوتين ممتاز جدا للشعر والبشره فرقت على شعري بعد مااخذته يطول بسرعه 
بس فيه شي احب انوه عنه وهو يزيد سرعه نمو الشعر بالجسم كله 

يعني مثلا اذا تشيلين شعر جسمك كل شهر بيصير تشيلينه كل ٣ اسابيع 
بس انا ماعندي مشكله لاني فعلا حابه نتايجه على شعري 

و تقدرين تاخذين من حبه واحده الى ٤ في اليوم 
بس طبعا بعد وجبه 

وانا اخذ ٣ في اليوم بعد الفطور والغدا والعشا 

والحبه نفسها جدا صغيره 

وسعر العلبه ٤٥ درهم 



بس اهم نصيحه اذا كنتي حامل او مرضعه ماانصحك تجربين اي فيتامين بدون استشاره الطبيب 

وشكرا لكم 

Friday, 25 October 2013

Weight Loss





بسم الله الرحمن الرحيم 






معاناتي مع السمنه هي 
احد الاسباب اللي خلتني افكر بعالم التدوين والكاتبه طبعا هذا غير حبي للمكياج وعالمه 

فقررت اكتب عن الواقع اللي اعيشه واللي غيرت الكثير منه 

من صغري وانا اشوف نفسي اسمن شوي من اللي حولي خصوصي في المدرسه 
حتى فيه الصف السادس اذكر مره اخذونا الي غرفه الممرضه ناخذ الوزن والطول لجميع طالبات الفصل 

اذكر وزني وقتها كان ٥٠ بالضبط و مااذكر اني شفت وزني بعدها بالخمسين اطلاقا 

وتمشي الايام والموضوع بالنسبه لي عادي لاني كنت اشوف فيه بنات مثلي وفيه بنات اسمن مني بمراحل بس 
تفكيري كان عادي دام اني القى مقاسي بالسوق ويطلع حلو ومرتب خلاص يعني انا طبيعيه 

وتمر الايام عادي من الابتدائي الى الثانوي والجامعه 

جت فتره قررت اخذ الهاردسك اللي عندي وفيه صوري وصور العايله قلت بسوي لي فايل واحط صوري فيهم

لاول مره اشوف نفسي بهالشكل واقارن نفسي بنفسي مااستوعبت ولا قدرت اربط بين اللي اشوفه وبين اللي بعقلي اني طبيعيه 

سكرت الملف والهادر كله وتركته ودخلت مرحله الضياع شلون ومتى 


سالت نفسي ليه مااحد قالي انتي سمينه 
او ليه انا ماانتبهت لنفسي 
ماكنت اشوف نفسي 

مرحله صعبه بس حلوه لانه فيها صراحه مع النفس ومراجعه اسباب كثيره 

مرت هالفتره وبعدها اشتركت بنادي صحي 

واخترت نادي فيتنس فيرست نادي عالمي ومشهور وله فروع كثيره واهم شي انه فيه فرع قريب للبيت 

بعد الاشتراك والدفع جا اول يوم اروح فيه رسمي وابدا 

الصدمه الكبيره لي كانت هي وزني ايه نعم وزني الجميل 

وزنت نفسي هناك وكان بالضبط ٩٣ كيلو وكان هذا بتاريخ ٢١/٥/٢٠١٠ 

قريب جدا من ١٠٠ كيلو 

واخذت وعد على نفسي اني ماارجع لهالوزن لو ايش يصير 
مستحيل 

بديت بالتمارين على الاجهزه وادخل كم كلاس بالنادي واخفف من اكلي 

وبتاريخ ٢٦/٦/٢٠١٠ نزل وزني الى ٨٩،٢٠ كيلو الحمدلله 

وبالتخفيف بالاكل و التمارين وصلت الى ٨٠،٥ كيلو 

وبدا وزني يثبث وبنفس الفتره كنت اقرا عن رجيم الاتكوتين في اقلاع 
وقررت اجربه  وفعلا نزلت عليه وتغيرت مقاساتي تمااااما 
طبعا استمريت عليه لمده ٧ شهور تقريبا 
من ١٦/١/٢٠١١ الى ١/٨/٢٠١١

ماكنت امشي عليه مضبوط وبالحرف الواحد لكن نزلت عليه ووصلت الى  ٧٦ كيلو


بس بعدها وقفت شوي شوي خصوصي انه تعب جسمي وبشرتي وشعري
شعري يتساقط بشكل خيالي وبشرتي تعبت وجهي شاحب واسود 
كنت ذبلانه باختصار 

وبديت اعالج شعري واحاول اكل شي صحي 
بس ماكنت اعرف وش اكل شي صحي زين ومفيد ولا يتعبني 

وبدا وزني يرجع شوي شوي الى ان وصل الى ٨٣،٥ كيلو  

طبعا هالزياده صارت في سنه وشوي ضايعه واحاول اخفف بس حبي للاكل كان اقوى

بس بعدها قررت ابدا صح لانه احدد قراراتي انه مافيه رجيم ابدا 
واحاول اثقف نفسي وقررت اتخذ نمط الحياه الصحيه 

بعد القراءه تكونت عندي معلومات جيده بس تحتاج الى توجيه صحيح وبصراحه خفت اكون بروحي بهالقرار 

وانتجهت الى عياده التغذيه وهي تابعه الى هيئه الصحه بدبي وتابعه الى حكومه دبي 
وهي مجانيه للاماراتيين فقررت ابدا وقلت ماراح اخسر شي 

وفعلا ماخسرت شي الا ربحت نفسي وصحتي خصوصي انه فيه احد يتابعني باستمرار

بديت مع الاخصائيه بتاريخ ١٢/١٢/٢٠١٢

يوم مميز بحياتي 

رحله لمده ١٠ شهور جميله بكل مافيها وصلت فيها الى ٦٩،٨ كيلو

الحمدلله الحمدلله الحمدلله 

وناويه اكمل باذن الله اكل صحي ومدروس وحياه صحيه وطبعا ماتخلو من التمارين 

واذا حابين ممكن اسوي سلسله متابعه كل شهر 
لاني كل شهر اروح للاخصائيه واوزن وممكن احط صور لاكلاتي والتمارين 

يعني سلسله متكامله 


بعد كم يوم موعدي مع الاخصائيه وبرجع اكتب لكم وش صار وكم نزلت وايش سويت هالشهر 

وبس هذا كل ماعندي اليوم 

واتمنى لكم حياه صحيه وراحه نفسيه 



Wednesday, 23 October 2013

Pandora Bracelet




مساء الخير 

من فتره لفتره احب اكافء نفسي بشي 
وهالمره وقع الاختيار على اسواره من باندورا 

Good evening
Who does not like to give himself a gift
not me !

I bought a bracelet for myself



اخذت اسواره فضه بقياس ١٩ سانتي مع تعليقه من الزركون والفضه على شكل قلب
silver bracelet watch 19-cm with charm zircon and silver heart-shaped



..

اخذتهم من محل باندورا في مردف سيتي سنتر بدبي
I Took them from the Pandora store at Mirdif City Centre in Dubai 
..

Tuesday, 22 October 2013

عرض من صيدليه بوتس


السلام عليكم 

قبل شوي جاني مسج من صيدليه بوتس 


وفيه عرض حلو للمنتجات البشره ٣ بسعر ٢

عرض جدا حلو  ولا يطوفكم 


MAC Haul - مشترياتي الاخيره من ماك



السلام عليكم 


عيدكم مبارك وعسى ايامكم كلها اعياد



تاخرت بكتابه اي بوست بس اجازه ووناسه والحين راجعين للجد 

رجعت بمشتريات جديده من ماك 


بعضها من ماك الفرع اللي بدبي مول و بعضها من السوق الحره بمطار دبي 







من اليمين 
فكس بلس - روجين - كونسيلر Pro Longwear - و Mineralize Skinfinish 

..

الفكس بلس شي رائع احب استخدمه قبل الميك اب وبعده اذا خلصت 
لاني احب اللوك الديوي و الكونسيلر شي رائع جدا هذا راح اسوي ريفيو كامل عنه 

نجي للارواج 


عن نفسي احب الارواج الثابته والمات واكره اللي فيهم لمعه او اللي كانها قلوس 

فاخترت هالروجين الاول  نوعه satin مو مات لكن من النوع اللي يعجبني وثابت 

و درجته : VIVA GLAM NICKI

والثاني مات ودرجته : PLEASE ME 

وهذا توضيح على ايدي 


..

واخر شي الحب الابدي 
Soft and Gentle 
من اروع الهايلاتر اللي شريتها بحياتي 
تعطي اضاءه حلوه للوجه ناعمه وفخمه 



ولازم تكون عند اي بنت بس اللي عندها مسامات كبيره وواضحه ماانصح فيها كثير لانه ممكن 
تبرز المسامات اكثر او ممكن تحطينها بس ماتقربين من المسامات 



وبس هذا كل اللي عندي الييوم نشوفكم بمشتريات جديده 


Friday, 4 October 2013

Review: Essence I love Stage




Essence I love Stage


برايمر او بيس او اساس للظل العيون 





منتج جميل  اساسي قبل اي شادو يثبت اللون ويخليه يبقى لفترات طويله 
يجي منه درجه وحده و تقريبا لونه زي الكونسيلر .. ومن خلال استعمالي له حسيت انه احلى شي
مع الالوان الترابيه و الالوان الغامقه جدا يبرزها وفعلا يعطيني اللون الصح 





قوامه غير دهني وهذا الشي جدا ممتاز خصوصي فيه ناس ماتحب الاشياء اللي تكون دهنيه لانه ممكن الشادو 
يسيح معاهم 


وغير هالشي هو بديل جيد لاي برايمر من الماركات مثل اربن ديكاي و تو فيس

سعره وهو صدمه بس ب ١٥ درهم فقط لاغير

وهذا شي ممتاز للي يحب يوفر ويدور على بدائل جيده 


Wednesday, 2 October 2013

مشترياتي من بوتيك خبراء المكياج - Haul - Pro Makeup Boutidue




السلام عليكم 

من فتره وانا اتسوق في الواحه سنتر في دبي 
لفت نظري كشك للمكياج جديد رحت وطليت عليه 

اسمه بوتيك خبراء المكياج




كشك يجمع ماركات جديده ومش متوفره في دبي الا عن طريق الطلب من النت 

مثل ال زي بالت والبيوتي بلندر وغيره الكثير

اولا حبيت خبيرات التجميل روحهم حلوه وتشرح لك عن كل منتج 

وكان اختياري ل ٤ منتجات 






من اليمين 

اخذت كريمين اساس  من ماركه Face atelier  و ٢ جل لاينر من ماركه Cailyn






كريمين اساس  من ماركه Face atelier  وهي ماركه كنديه

اللي على اليمين يناسب لون بشرتي وهالكريم روعه رطب وتحسين انه البشريه طبيعيه ونظره ورطبه فيها حيويه
جدا حبيته 

والكريم الاساس الثاني هو بلون غامق جدا مثل ماهو واضح الحلو فيه اني اقدر استخدمه ككريم اساس
او كوركتر لاني اعاني من هالات سودا صعبه ولازم استخدم كوركتر 

فهذا حلو ممكن لحاله في البدايه وممكن اخلطه من كميه صغيره من كريم الاساس الفاتح واستخدمه ك كوركتر 

وحبيت النتيجه 

بس اذا لسهره او مناسبه شوي كبيره لازم استخدم كونسيلر فوقه 


الاسعار الكريم الاساس الحجم الكبير ب ٢٣٥ درهم
والصغير ب ١٦٥ درهم




ماركه امريكيه 

انا انسانه احب الجل اي لاينر ولفت نظري هذا خصوصي انه ضد الماء ويظل لمده ٢٤ ساعه 
طبعا ماجربته لمده ٢٤ ساعه بس حبيت ثباته ولونه القوي وناعم جدا بالرسم 

شكل العلبه حلوه ومعاه فرشه خاصه فيه وهالشي حلو حتى الفرشه حلوه بالرسم حبيتها 

اخذت اللون الاسود و اللون الاخضر 

هنا بالصوره باين انه الاخضر فاتح بالعكس هو غامق وتقريبا زيتي ماقد شفت مثله بماركات ثانيه 

الاسعار الواحد ب ١٣٥ درهم


وبس هذي مشترياتي من عندهم واكيد برجع لهم واشوف جديدهم


هو متواجدين فيه الواحه سنتر الطابق الاول 





<a href="http://www.bloglovin.com/blog/10877025/?claim=bysz32ufbre">Follow my blog with Bloglovin</a>

Tuesday, 1 October 2013

Empties: Products I've used up!



Products I've used up

منتجات خلصتها ومع رفيو صغير عن كل منتج


من اليمين 



عطور او سبري للجسم 
اول واحد ريحته خيال ولا استغني عنه من ماركه كول اند كول الاقيها عندنا بالجمعيه التعاونيه ب ٢٢ درهم 
هذا ثالث واحد اخلصه والرابع باقي فيه اقل من الربع جدا احبه ريحته ريحه بودره اطفال وهو اصلا للاطفال 
اكيد برجع اشتريه 

الثاني من باث اند بدي ريحته حلوه وممكن ارجع اشتريه 

الثالث مالقيت هالماركه عندنا في دبي بس اخذته من الخبر من كارفور اللي بالراشد 
كانه كان ب ١٦ ريال شي كذا 
بعد حلوه ريحته 






وخلصت ٢ من محلول العدسات 
رينو عادي بس الثاني clarity plus حبيته اكثر جدا مريح للعين وبرجع اشتريه اذا خلصت اللي عندي



st.ives  اولا احب هالماركه واثق فيها جدا وهالماركه سخيه جدا بالكميات وسعرها قليل مقارنه 
بباقي الماركات .. 
هالكريم هو للوجه وفيه كولاجين واخذته بعد مدح الدكتور اوز له 
وحبيته خفيف على البشره والحلو انه مو دهني وهالشي ناسبني بحكم انه بشرتي مختلطه 
والسعر مو ذاكره للاسف بس انه رخيص 

والكريم الثاني من اولاي
دائما دائما منتجات اولاي تعطيك نتيجه حلوه لاول اسبوعين وبعدها
يكون عادي جدا مااحس بالفرق معاها وتنقلب بشرتي الى زيتيه 
ماراح ارجع اشتريه 





البودره هي العشق والشي المستحيل استغني عنه باي شكل من الاشكال
مااذكر عدد العلب اللي خلصتها بجميع الاحجام شي يومي بالنسبه لي 
واحب العاديه اكثر من الجديده جربت اللي لونها بنفسجي عاديه وجربت هذي الزرقاء 
ماحبيتها بصراحه 
فيها نشاء الذره ويبقى على الجسم 



مرطبات للشفايف 
الرمادي اول دقيقتين كانه قلوس وبعدها يجف 
اخذته من صيدليه بوتس 
ماحبيته ولا برجع اشتريه 

اللي بعده من لابيلو بالعسل والحليب 
هذا حبيته واحب ريحته وشريته كذا مره 
وممكن ارجع اشتريه بس اذا خلصت اللي عندي 

والمنتج الاخير 

سيروم من بوبي براون 
جدا حبيته واخذته هو مع مجموعه كريمات من بوبي براون 
الحلو فيه انه يسكر المسامات ويخلي الوجه ناعم وتقريبا صافي
كنت استخدمه يوميا بعد التونر احطه وبعدها احط كريم الوجه 

جدا حلو ممكن ارجع اشتريه بس بعد فتره لاني حاليا استخدم سيروم من استي لودر




عطور خلصتها

اللي على اليمين عطر قديم بس احب ريحته 
اخذته من محل بمجمع الراشد بالخبر 
دايم اشتريه اذا جيت للخبر 
يمكن تلاحظون احب اي شي ريحته بودره 


والثاني من نينا ريتشي 
حلو بس ماافكر ارجع اشتريه فيه لستت عطور ودي اجربها 


وبس هذا اللي خلصته في هذي الفتره
واكيد لي رجعه بمنتجات جديده لانه عندي اشياء كثيره باقي فيها القليل 


مع السلامه