الأربعاء، 29 يناير 2014

Review : Shimmer Brick Compact in Bronze Bobbi Brown

السلام عليكم 

Shimmer Brick Compact in Bronze Bobbi Brown



ريفيو اليوم عن شي جميل جدا جدا 

هايلايتر من بوبي براون ، هالماركه الانيقه 

جربت منها كذا شي اساس ، كوريكتر ، كونسيلر ، كريمات للوجه والعين 
كل شي جميل منهم ، الا من فتره صار الكونسيلر يخطط بس مناسب اختي وممتاز معاها . 

كنت مسافره على خطوط طيران الامارات واستغليت طبعا العروض الموجوده 
ولقيت عرضين جميلين على بوبي براون الاول ل لكحل الجل اسود وبني مع فرشه صغيره لرسم الكحل 

والعرض الثاني وبتكلم عنه اليوم هايلاتر جميل جدا مع فرشه للوجه

وتقريبا اذا مو غلطانه الاسعار كانت بين ال ٢٥٠ الى ٣٠٠ درهم مو اكثر ولا اقل 
ويعتر لقطه . 

....



العلبه انيقه جدا من البلاستك الاسود مع مرايه حجمها جدا حلو والعلبه سهله الفتح . 



 الاستخدامات : 

- هايلاتير طبعا ممكن تدمجين الالوان كلها سوا وتعطي نتيجه خياليه بروز على ذهبي 
او 
    مثل ماانا احب استخدمه اني اخذ الفرشه وامشيها على اول ٣ الوان من فوق واحط على اعلى مكان
في الخد وبعدها امرر الفرشه مره ثانيه على ٣ الوان الباقيه واحطه بمكان الكنتور  اللون واللوك فتنه 

- ظل للعيون ايه ظل للعيون جميل جدا اختاري اي لون وحطيه كظل وروعه واحب اخذ اول لون واحطه تحت الحاجب
للسهره يعني اضاءه حلوه للحاجب .

- احط منه في السهرات او الاعراس على جسمي بفرشه كبيره وجميل جدااااا 
على الرقبه و الكتوف 

- وبعد يستخدم كبلاشر واحب حلو مع الدرجات الثانيه خصوصي انه فيه منه فوشي ومشمشي ف بيصلح كبلاشر 

...



-القليل منه كفي ويبقى ثابت على الوجه ، مسحه خفيفه تعطي نتيجه حلوه .
-يعطي لوك لبشره صحيه ونظره لوك ديوي .
-اللي عندها مسامات واسعه تبعد المنتج شوي عن المسامات لانه اي شيمر يبين المسامات 
-بس ممكن استخدام خافي للمسامات مثل بروفيشنال من بنفت ممتاز لحل هالمشكله . 
-درجه البروز تناااسب جميع البشرات بجميع الدرجات . 



فيه شغله بنوه عنها 
الهايلاتر سهل الكسر على كلام كذا وحده حتى قريبتي انكسر عندها 
انا الحمدلله ماعانيت من هالشي بس الافضل احفظوه بعلبته عند التنقل 
وفيه مثل الفلين فوق الهايلاتر خلوه دايم لانه هو اللي يحميه من الكسر 



الخلاصه هايلاتير انصح اي وحده يكون عندها ويكون من الاساسيات 
لانه رائع واكيد بشتريه مره ثانيه اذا خلص 
مع اني كثير استخدمه بس مو باين اني استخدمه وكانه جديد مع انه صار له سنه وشوي عندي

منتج اقتصادي جدا وسعره فيه 

بس اللي اعرفه انه اسعار بوبي براون كل مالها وتصير اغلى .


( التصوير كان باضاءه الشمس وماحطيت تاثير او تشبع لوني للصور عشان تشوفون الدرجه صح ) 

الحياة الصحية - ٤

السلام عليكم 




بالبدايه الموضوع ابد مو مرتب كل شي جا في بالي اليوم كتبته 
كتبته على مرتين جزء الصبح ( وبتلاحظون انه غير متفاءل - وجزء كتبته بعد زيارتي لعياده التغذيه ) 


ببدا على طول وبدون مقدما او ترقيع للموضوع 
صار لي تقريبا ٥ شهور ووزني تقريبا ثابت بين ٦٩،٩ و ٦٩،٢ كيلو 

صح كرقم حلو لكن انا خلاص مليت وتكاسلت نوعا ما ، خفت الرياضه عندي والاكل نوعا ماتغير 
صح اني اكل عادي يعني اللي موجود بس باعتدال ومع ذالك ماينزل الوزن بس كان فيه اختلافات شوي بقياسات الجسم
وهالشي حلووو طبعا بس ودي انزل عن هال ٦٩ كيلو 

مممكن اللي شوي اخرني في النزول هو اني جالسه احقق احلامي تقريبا كلها حاليا 
احد احلامي اني اتعلم السياقه والحمدلله مابقى لي الا كلاس واحد وبعدها الاختبار النهائي واللي يحدد 
اني اخذ الليسن او رخصه القياده او لا 

بس ان شاء الله اخذه يااااارب 

احد العيوب اللي فينيي واللي احاول اني اعدلها هو اني مااعرف اجمع بين كذا شي بوقت واحد
يعني مثلا المدونه والنادي والتدريب والتصميم والتصوير كلها تقريبا اشياء يوميه لازم اسويها

بس صرت اقصر بشي لحساب شي اخر 

حاليا مقصره بالنادي عشان السواقه بس لا لا لا ، الحياه اكبر بكثييير من هالعالم 
والواحد المفروض انه يعرف يرتب نفسه واولوياته ، وهذا ان شاء الله بشتغل عليه 


غير هذا حاليا احس حياتي غير مرتبه ودي ارتبها اكثر او اهذبها ان صح التعبير 

----

كتبت اللي فوق الصباح قبل مااروح لموعدي في عياده التغذيه 
بس الحمدلله رجعت مبسوطه وجداااااااا جدا ليه ؟

وزني ولله الحمد ٦٩،٤ كيلو الحمدلله 
بس نزلت كيلو كييييلووو في الدهون والحمدلله على هالشي لانه هو كان تركيزي من البدايه 
وصلت لاخر منطقه الامان زي مايقولون المفروض الدهون بالجسم تكون من ١٢ الى ٢٢ 
وانا وصلت ٢٢ 

كنت ٣٣،٧ واليوم ٢٢،٨ 
يعني نقصت ١٠،٩ كيلو من الدهون الحمدلله يااارب 

جدا شي جميل ، وباذن الله انزل نسبه الدهون اكثر واكثر وينزل وزني اكثر 
موعدي الجاي ان شاء الله بعد شهر وشوي بتاريخ ٣ - ٣ 

وودي انزل كيلو على الاقل اتخلص من هال ٦٩ يااااارب 


----

وبتكمل عن شغله صغيره وهي ابدا مو صغيره 
الوزن والدهون تعطينا عمر اكبر بكثيررررررررر 

في العياده بجهاز الوزن يطلع كل شي بالجسم ( الوزن - نسبه الدهون - العضلات - السوائل - العظام - والعمر الجسم )

واقصد بعمر الجسم انه يطلع لي عمر جسمي من ناحيه الوزن والدهون والعضلات 
وكل ماكان الواحد صحي اكثر ورياضي يكون عمر جسمه مثل عمره الحقيقي والرياضيين عمرهم الجسمي اقل من الحقيقي

انا عمري ٢٩ سنه وجسمي ووزني والاشياء اللي كنت مهببتها فيه عطتني عمر غير
حاليا عمري الصحي والجسمي ٣٨ سنه 
يعني يفرق عن عمري الحقيقي ٩ سنين 

٩ سنين مو شوي ابد وهال ٩ بعد نزول وزني وصرت انسانه رياضيه وصحيه قدر الامكان 

اول مابديت وقررت اني اتخلص من عالم السمنه كان عمري ٢٧ سنه ووقتها عمر جسمي ٤٦ سنه 
كثيرر وشي مؤلم بصراحه 

يخلي الواحد يفكر هو ليه وصل لهذي المرحله ويطرد كل هالاشياء السلبيه من حياته 

لاتخلين الوزن والسمنه تاخذ من عمرك لاني فعلا ندمانه على هالشي ، وماعشت حياتي 
انا من النوع اللي يستحي وغير جريئه ، بس تقريبا الكل ملاحظ انه شخصيتي تغيرت للافضل 
انفتحت علي الناس بديت اطلح بشخصيتي وبذوقي 

انا عندي جنون وبديت اطلعه ولا بستحي من اي شي لانه كل ماقدمت شي انا احبه اشوف ردود الفعل والاصداء جميله
وكل مره يقولون لي انتي فيك اشياء جميله وطاقات حلوه بس انتي دافنتها ولا شفناها 

انا والحمدلله كل عايلتي مساندتني بهالشي وتقريبا كلنا في البيت غيرنا شوي من عاداتنا القديمه 
ونتجه اتجاه صحي . 

الحدلله رب العالمين ، يارب طلبتك الصحه والراحه للجميع . 


---------------


احد اسباب النجاح والحياه الصحيه انها تكون نظيفه وخاليه من الشواءب 
ببدا برتيب وقتي - غرفتي - تنظيم الادراج 

ابي اخلي حياتي سهله وسريعه ، حاليا اكتب بعشوائيه بس اللي عنده اي افكار انا حابه اطبقها 

عندي كذا فكره في بالي :
الاسبوع فيه ٧ ايام 
- ٣ ايام اروح للنادي ( الاحد - الثلاثاء - الخميس ) 
- اكتب تدوينتين كل اسبوع . 
- تصميم بالفوتوشوب كل اسبوع ( مو شرط لاحد - لنفسي )
- الاهتمام بالنفس من ناحيتين ( عقليه و روحيه ) احب القراءه بس بعيده عنها جدا هالفتره بس راجعه لها 

اليوم تاريخ ٢٩ / ١ / ٢٠١٤ 

بعطي نفسي شهرين للترتيب ودخول هالروتين المفيد والمشرق 
وبحط هنا كل شي اسويه ( حتى لو كان ترتيب الميك اب - او قراءه كتاب ) 

واتمنى تساعدوني بخبرتكم ، كلنا نتعلم وكلنا نطمح بالافضل .


شاركوني باي شي تحبونه احب اسمع منكم واستفيد وبعمري مابقصر بشي اعرفه لاني اعيش هالتجربه معاكم وفيكم 

وسؤال ثاني ... حابين موضوع صحي مثلا كل اسبوع او كل اسبوعين ؟ وعن ايش تحبون اتكلم عنه ؟ 

الثلاثاء، 21 يناير 2014

Review Revlon Double Twist Mascara



Review Revlon Double Twist Mascara



السلام عليكم 


ريفيو سريع لماسكرا دبل توست من ريفلون 


الفرشه غريبه وجديده وهالشي هو اللي شدني لهالمنتج 
الفكره = فرشه ماسكرا عاديه + فرشه ماسكرا بلاستك 


حسيت انها ممكن تكون حلوه وتعطي مفعول رائع 





الايجابياااات 

للاسف الشديد مافيه ولا شي 

لانها من اسواء الماسكرات اللي جربتها واستخدمتها بحياتي 

كل شي فيها سييء 


..

العيوب :

- حجم الفرشه كبير و صعب انها تطلع من العلبه عشان الاستخدام 
- الفرشه البلاستك اللي لونها احمر تدخل بالعين يعني لازم اكون حذره جدا خصوصي انا البس عدسات
- تلطخ شوي وبعد فتره الاقيتها تتفتت وتنزل اجزاء منها على الوجه 
- المنتج صعب ازالته من الرموش ومتعب خصوصي انها ضد الماء وهالشي متعب اكثر 
- اول مااحطها حلوه وترفع الرموش بس بعدها فتره مااحس اني حاطه ماسكرا من الاساس 




الخميس، 9 يناير 2014

مشترياتي من باث اند بودي & فكتوريا سيكرت


السلام عليكم 

تدوينه سريعه وبسيطه 



امس كنت في زياره سريعه لدبي مول وكنت رايحه مخصوص ل فكتوريا سيكرت 
بعد مانزل وزني تغيرت مقاساتي جذريا واخذت انواع من البرا وخصوصي انا مجربه نوع من قبل 
وعلى قد ماحبيته رجعت اجيب منه اكثر ، ونوعت هالمره بس طبعا غير قابلين للعرض هنا 

بس للي حاب يجرب منهم حاليا عندهم عروض حلوه والاجمل انك تخلينهم ياخذون قياسك مضبوط 
بس عالم من الرفاييه في مكان غرفه القياااس ، الحلو انهم ياخذون قياسك مضبوط وتجربين كذا نوع برا

الى ان ترتاحين وهم يشوفون انها قياسك مضبوط بعدها تسجل لك القياس في كرت صغير 
مع جميع انواع البرا اللي حبيتيهم ، وبعدها تطلع معاك بره للمحل وتراويك اماكن البرا اللي اعجبتك وتعطيك 
وش يناسبك ، واللي حبيته فيهم تسالك من الاول تبين مع القسم العادي او اللي عليه تخفيض وهالشي جدا عجبني

* والكرت ينكتب فيه اسمك ، تاريخ الزياره ، مكان المحل في اي مول ، القياس والانواع " الكرت بيقى عندك " 
وفي كل زياره تطلعين لهم الكرت وبسرعه يساعدونك .


كاني كثرت بالكلام نجي للشي القابل عرضه هنا 




من جهه الشنط والاكسسوارات اخذت هالشنطه الوسط ب ٥٠ درهم وكانت ب ١٠٠ درهم 

وهالشنطه الصغيره ب ٢٥ درهم وكانت ب ٥٠ درهم 



وهذي اخذتها لاختي نفس حجم الشنطه اللي فوق ب ٥٠ درهم وكانت ب ١٠٠ درهم 

اللي حاب هالنوع من الشنط والاكسسوارات فيه كثييير واشكال بس اخذت على حسب حاجتي 

وعندهم بجايم روعه انيقه وناعمه  على ١٢٠ درهم بس حاليا عندي اكتفاء ذاتي من البجايم بس مايمنع اذا فهت نفسي
اجيب لي خصوصي اني احبهم وعندي اخت مجنونه بجايم يعني العدوى تنتقل . 


نروح لباث اند بودي  لاول مره ادخله وتكون مشترياتي منه معقوله " الحمدلله " 

وقليله جدا [ احد قرارتي هالسنه اني اجيب شي على قد حاجتي ] 

لاني هالسنه في مرحله وصلت انه يكون عندي ١٦ لوشن للجسم وكلهم مفتوحين بنفس الوقت 
ومده الصلاحيه لبعضهم اما قربت او شي خلص فخلاص توبه 





من اليمين عطر Amber Blush و بودي سبريه 

هالريحه جديده و جننتني ، شميته من اسبوع في الامارات مول رشيته على يدي واول ماشميته 
حسيت ريحته دوا فتركته ومشيت ، طول ماانا بالمول والى السياره وانا اشمه تغيرت الريحه تمااااما 
صار كانه ريحه عطر فرنسي راقي ، حتى اعجب امي واختي مع اني اختي مو اي شي يعجبها بالعطور وبسرعه
تمل من اي عطر ...

فحطيته في بالي واخذت المست ولقيت العطر الصغير عند الكاشير واخذته . 

المست ب ٨٥ درهم مافيه تخفيض لانه جديد 
العطر ب ٢٠ درهم وسعره الاصلي ٣٠ درهم .

واخر شي كريم للجسم عالنوع احبه لانه بترطيب ثلاثي بريحه توايلايت ووود 
هذي الريحه المفضله لي من باث اند بودي اعشقها ولا امل منها 

سعره ب ٢٥ درهم بعد التخفيض 


وبس هذي كل مشترياتي 

الجمعة، 3 يناير 2014

عصـفـور الجـمـعـه



عصفور الجمعه
 يحلق في هذا اليوم الفضيل ، موعدي معه دائما امام نافذتي واثناء صلاه الجمعه .





تجدوني هنا في الفلكر الخاص بي 
او 

هنا في الحساب الثاني لي في الانستقرام