السبت، 9 مايو 2015

April Empties 2015 || أشياء خلصتها في ابريل ٢٠١٥



April Empties 2015 || أشياء خلصتها في ابريل ٢٠١٥



السلام عليكم 

هالشهر خلصت كذا شي ، الاكثر طبعا اشياء العناية 
نشوف وش خلصت هالشهر 

..


- شامبو من nectar of nature ، اخذت من كارفور رخيص ب ٦ ، النوع اللي معاي بالحنا و البندق 
صراحه حبيته وعادي جدا ارجع اشتريه ينظف الشعر زين ولا يدهنه 

- غسول للفم من كولجيت ، هذا خاص باللثه ، والله حلو وطعمه زين 

- كريم اساس من ميك اب فور ايفر درجتي فيه ١٤٠ ، ممتاااااز عادي جدا ارجع اشتريه يعطيني لوك ديوي
وهذا اللي احبه فيه ، غير هذا انه تغطيته حلوه واقدر ازيد كذا طبقه بدون مايبين انه ثقيل 

- كريم اساس هلثي مكس من برجوا ، حبيته حيل ، تغطيته حلوه و عطي لوك ديوي ، انا مااحب الفاونديشن المات ابدا 
وهذا حقق لي كل اللي احبه ، ينفع فاوندشين يومي .

..


- شاور جل للجسم من باث اند بودي بريحه التوايلات وود ، من الروايح المفضله عندي من باث اند بودي .

- العشق الابدي ، سيروم الفيف من لوريال ، شوي عليه كلمه رائع استخدمه من زمااان من ايام المدرسه ، مااستغني عنه ابدا.

- محلول عدسات بحجم صغير .

- كريم لليدين من لوكستيان كتبت عنه ريفيو صغير بالانستقرام ، رائع خفيف وبسرعه تتشربه البشره 
وريحته ليمون حلوه .

...

- عينه كريم واقي للشمس من لانكستر ، حبيته بصراحه اساسه مائيوغير دهني ابدا ، وريحته حلوه مافيه ريحه واقي الشمس المزعجه .

- ماسك بالطين من Dermato Poietin حلو ينظف الوجه ويشيل الدهون ، انا كنت احطه بس على التي زون ،
بس ماخلصته كله تقريبا نص بس وبعدها خلصت مدته .

- كريم للوجه من soap & glory ,وفيه حمايه ٢٥ ، يعني كريم عادي وفيه حمايه مافيه شي مميز ،
ماراح اشتريه مره ثانيه .

- سيروم وكريم للوجه من لوريال Skin Perfection اخذت هالمجموعه من زمان من المطار
وماشفتها عندنا بالسوق ، حبيت السيروم اكثر من الكريم ، المجموعه توعدك انها توحد لون البشره وتفتح التصبغات 
حسيت السيروم فادني اكثر من الكريم ، الكريم ترطيبه حلو ، بس مشكلته انه عطري 
ساعات اذا بشرتي مرتاحه عادي ، اما اذا كنت محسسه مااستخدمه ، لانه ريحته قويه بزياده .

...


- عطر powder blue اعشقه وخلصته كل اللي عندي منه ولا عندي باك اب منه ، اعشق ريحته نظافه وبودره.

- بخاخ العود من عطورات العبدالمحسن من الكويت ، ريحته دهن عود فخمممم ،رشه خلاص تكفي ومع البخور ياسلام .

- عينه عطر من لانكوم Hypnose ، صراحه حبيته ، انيق وحلووو .

- و٤ سابملز لعطورات مختلفه ، احاول اخلص مجموعه السامبلز اللي عندي .

...


- مناديل للاطفال ، احبها وريحتها روعه نظافه ، كل ماخلص شريت منه .

- مناديل نيتروجينا اعشقهم ، تنظف من قلب وتكلمت عنهم من قبل اكثر من مره .

- قطن للوجه ، من محل تاتي ممتاز وسعره رخيص فيه ١٢٠ حبة .

...

وبس هذا كل اللي خلصته هالشهر 


هناك تعليقان (2):

  1. أزال أحد مشرفي المدونة هذا التعليق.

    ردحذف
  2. أزال أحد مشرفي المدونة هذا التعليق.

    ردحذف