الاثنين، 20 يونيو 2016

ماسك الفحم من اورجنز || origins clear improvement active charcoal mask


ماسك الفحم من اورجنز || origins clear improvement active charcoal mask




السلام عليكم 


انتشرت بالفترة الاخيرة ماركة Origins وصاروا البنات يطلبونها اكثر واكثر بس للاسف الشديد انه الماركة
مو موجودة عندنا .. بس نقول ان شاء الله قريب يوفرونها لنا .. 

بتكلم عن ماسك الفحم واللي اشتهر هالفترة بزيادة .. وبكل صراحة اعجبني وعرفت شنو السبب !!


هالماسك ينقي وينظف البشرة من الدهون ، يشيل كل الدهون الزايدة ويخلي شكل البشرة افضل لانه اذا البشرة دهنية 
وتراكمت الدهون راح تتكون عندنا حبوب صغيرة وبعدها ممكن يكبر ونبدا في مشاكل ثانية ف الافضل العناية المستمرة
وتنظيف البشرة بشكل عميق كل اسبوع .. 

الماسك اهم مكون فيه هو الفحم ، والفحم معروف انه من افضل المكونات اللي تحارب الدهون .. 

طريقة الاستخدام علي بشرة نظيفة تحطين كمية حلوه على كامل وجهك لمدة من ٥ الى ١٠ دقائق او الى ان يجف 
وبعدها تغسلين وجهك وتشيلين الماسك كله .. 

اول ماتحطينه عادي ممكن يحرق بعض البشرات الحساسة والبعض عادي جدا .. بس تحسين بلسعة خفيفة لمدة كم ثانية بس وبعدها خلاص تختفي .. اذا بدا يجف الماسك راح تحسسين بشرتك مشدوووودة جدا وهذا احلى شعور وقتها اصلا
ماتقدرين تتكلمين زين او تسوين اي تعبير بوجهك .. 

النتيجة حلوه بصراحة بشرة نظيييييييفة وخالية  من الدهوووون ماتشوفين اي لمعة بالوجة بس مايجفف الى درجة الجفاف الشديد .. هو يشيل كل الدهون ويترك البشرة نظيفة من الداخل ينظف المسامات بشكل جدا حلو .. 

اذا كانت بشرتك جافة جدا ماافضلة لها ، اما اذا مختلطة حطية على الاماكن الدهنية فقط .. واذا بشرتك دهنية فهو افضل ماسك ممكن تستخدمينة بشكل اسبوعي .. 

انصح فيه وبشدة .. 

الماسك اللي عندي بالحجم الصغير وكان مع مجموعة ماسكات بجربها واقولكم رائي عنها بعد التجربة .. 


السبت، 18 يونيو 2016

March & April Empties 2016 || اشياء خلصتها في مارس وابريل + ٥ شهور على التحدي


March & April Empties 2016 || اشياء خلصتها في مارس وابريل + ٥ شهور على التحدي



السلام عليكم 

تاخرت جدا في طرح هالموضوع بصراحة انشغلت في الفترة الاخيرة وايد و بعدها ماشاء الله دخلنا 
في شهر الخير شهر رمضان والكل منشغل فيه عسى الله يعوده علينا بكل خير ...

خلاص الشهرين اللي راحوا خلصت اشياء وايد بصراحة وكنت بحط الاشياء اللي خلصتها في شهر ٥ بس شفت انه 
الموضوع راح يكون طويل بزيادة ، ف شهر ٥ و٦ راح يكوونون في موضوع ثاني باذن الله .. 

بسم الله نبدا .. اول شي اقدر اقول اني حققت هدفي ولله الحمد
انا عندي هدف اني اخلص ٢٠ منتج كل شهر وخلصت خلال شهرين ٥٢ منتج شي جمييييييل جدا 
جدا وفخوره بنفسي لاني انجزت شي ..

نبدا بالميك اب 


- ماسكرا من ميك اب فور ايفر smoky Extravagant 
شكل الماسكرا غير كانها شجرة الارز ، تعطي جحم وسط للرموش وكثافة خفيفة بعد بس سوادها حلو ، بس ماينفع تكون بروحها لازم معاها ماسكرا ثانية ، وتكتل اذا حطيتي طبقتين .. مااتوقع اني راح اشتريها بس عندي سامبل منها بستخدمه وخلاص ماراح ارجع اشتريها .. 

-

ماسكرا Volume Lash Styler من #ايسادورا 
اول ماجربتها ماحبيتها ابدا .. اولا رطبة وتخرب الميك اب وكانت ماتغييير اي لوك بالأساس تخلي رموشك كانهم كم حبة .. خليتها فتره ورجعت جربتها من جديد ❤️
عكس كل كلامي اللي فوق .. تعطي طول حلو مع شوي حجم للرموش .. توصل لمنابت الرموش بشكل حلو ولا تأذي العين .. ثباتها حلو .. ماانصح بأكثر من طبقتين وبشكل خفيف لانها راح تتكتل بشكل مو حلو .. الفرشة بلاستك ومرنة .. اللي عندي لونها اسود ورقمها ٣٠ 

- كريم اساس من ميك اب فور ايفر ، حلو للبشرة العادية الى الجافة ، مااشوف وايد يتكلمون عنه ، خفيف على البشرة
بس الدرجة شوي كانت غامقة علي ف صوت اخلطه بشوي من هلثي مكس من برجوا .. 
مااتوقع راح اشترية مره ثانية لاني حبيت الهلثي مكس اكثر .

- كريم اساس هلثي مكس من برجوا ، من احلى كريمات الاساس اللي جربتها ينفع يكون يومي ولا ياثر على البشرة
وحلو تخلطينة مع اي كريم اساس ثقيل يطلع حلو ، ساعات احط ضغطتين منه مع ضغطة وحدة من دولتشي اند غابانا ويكون حلو للنهار اذا عندي مناسبة .. اكييييييد برجع اشترية اكثر من مره وشريت لي باك اب منه .. 

- بروفيشنال من بينفت ، حلو للمسام على الانف او الخد احط منه شوي ويخفف لي من شكل المسام ..
عندي بعد منه سامبلز بستخدمهم وبعدين بشتري لي بداله .. 


...



وهذي اشياء خلاص قديمة وابي اتخلص منها ، انا كل فترة اطلع القديم او اللي استخدته وايد ..

...


نروح لمنتجات الشعر 

- شامبو الفيف للشعر العادي الى الجاف  انا شعري دهني وماناسبني ابدا .. كان واصل لي في علبة قلام بوكس
بس استخدمه لشعري اذا كنت حاطة زيت بشعري عشان يشيله كله .. اللي شعرها جاف راح يعجبها 

- بديل الزيت من لوريال ممتااااااز يخلي الشعر زبدة ، انا احب احطة قبل الشاور لمدة ساعة وشعري ناشف 
واغسلة بعدين .. يرطب شعري بشكل حلو انا شعري دهني عن الفروة بس الاطراف جافة وهذا يرطب لي شعري ...
يمكن ثاني علبة اخلصها منه .. 

- سبريه للشعر من بوتس ، والله جميل كنت مستعجلة ومالقيت الا هو جدامي واخذته وممتاز والله
وحتى ريحته حلوه وسعره رخيص ب ٦ او ٩ دراهم ..

- ماسك الماكاديما للشعر جدا حلو يرطب الشعر بشكل جميل واتوقع الكل جربه لانه اخذ صيت عالي 

- فيتامين الشعر اللي ارجع دايما اشتريه ومناسبني جدا والحمدلله ماشفت اي اثار جانبيه عليه وهذا ريفيو كامل عنه .

...
نروح لمنتجات العناية بالبشرة 


- كريم للوجة من كودالي ، هالمجموعة استخدمتها كلها بس بصراحة ماشفت منها فايدة كبيره للاسف . 

- غسول زيتي لازالة المكياج من Nip+Fab للاسف الشديد ماحبيته ابدا يحرق العين ويغوشها بعد صح يشيل الميك اب بس ثقيييييل ثقيل بزيادة ، ابدا ماراح افكر اشتريه مره ثانية ..

- كريم واقي من الشمس من افين ، هالنوع للاسف ماناسبني ابدا ابدا ، يخلي وجهيي رمادي وابيض اول مااحطه ، ماعجبني ابدا 

- كريم واقي من الشمس من شسيدو هذا حلو وكتبت عنه موضوع كامل هنا شوفوه 

- تونر للبشرة من لاش جدا حلو حبيت انه ماحسس بشرتي وممكن ارجع اشترية مره ثانية ، كتبت موضوع كامل عن منتجات لش وكتبت عنه بعد هناااااا

...


- سكراب ال 7 scrub من كلينك ، جدا جدا حبييييته عادي جدا اني ارجع اشترية حبيته ويقشر البشرة بشكل حلو ويخليها ناعمه بعد التقشير . 

- الجمااااال كله سيروم تفتيح البقع للبشرة من كودالي عادي ارجع اشتريه اكثر من مره جدا جدا ممتاز كتبت عنه في الانستقرام 

- كريم العيون من N 7 ، عادي بصراحة كتبت عنه في الانستقرام 

- سيروم من كودالي من نفس مجموعة الفيتامين سي ، عادي بصراحة ماحسيت معاه بنتيجة حلوه للاسف .

- غسول منظف للوجة من لش ، فكرته غريبة شوي تاخذين شووي منه وتذوبينه بماي وبعدها تغسلين وجهك ، حلو للبشرة الجافة والحساسه .

...


- سيروم للعيون من كيلز ، قريت عنه وايد انه ممتاز ويخفف من الخطوط والتجاعيد ، للاسف ماشفت منه اي نتيجة خلصته كامل بس مافيه اي شي يذكر غير الترطيب . 

- سيروم من Eucerin ، تستخدم كل امبولة لمدة اسبوع كامل وتساعد بتفتيح البقع في البشرة ، والمفروض استخدم كل ال ٦ امبولات مع بعض انا استخدمت وحدة بس ومااقدر احكم عليه .. لين مااخلصهم كلهم مع بعض ..

- عينة واقي من الشمس من بايودريما ، ماحبيييييته ابدا يخلي الوجة ابيض وبعد فترة يصير رمادي ..

- لوشن خفيف جدا للترطيب من جيفنشي ، حبييييييته وممتاز قبل الميك اب جدا جدا حلو ، عينة وصلت لي من قلام بوكس .

- عينة تونر من ماركة كورية ايضا كان من قلام بوكس عاددي ماشفت شي واااو منه .

...


- ماسك من ماركة دكتور جارت لتصغير المسام ، جدا حبيته وكتبت عنه في الانستقرام  وعادي ارجع اشترية .
- سامبل من دريمالوجيكا اعشق هالماركة جدا ومنتجاتها تناسبني ولله الحمد ، هي عطتني هالعينة احطها على اماكن الحبوب والحمدلله خفت ، وناوية ارجع اخذ الحجم الاكبر .

- بعد عينة واقي للشمس من بايودرما بعد ماحبيته .

- الحب والعشق كله ، قطن دايسو راااااائع جدا جدا وناعم على البشرة وورخيييييص يستاهل والله .

..

نوصل ل منتجات الجسم 



- كريم للجسم بزبدة الشيا من ايف روشية راااااائع جدا جدا وناوية ارجع اشتري منه من جديد بس اخلص من كم منتج من عندي 
حبيته وكتبت رائيي فيه جدا ممتاز لترطيب البشرة .. هذا رائي فيه 

- كريم مرطب للجسم بريحة المسك هو تابع لمجموعة ، انا احب ريحة مسك النخبة اعشقها هالكريم حلو كريحة بس اما الترطيب عادي مثلة مثل اي مرطب للجسم .

- شاور جل بزيت الزيتون اخييييرا اخييييرا خلصته ريحته للاسف ماحبيتها ريحة زيت زيتون قوية ابدا موحلوه والعلبة كبيرة 
صراحة صرت استخدمه لاي شي بس عشان اخلصه .. ماحبيته ابدا ..

...


- كريم Complex A، اخذت بعد كلام الصيدلي عنه لاني كنت ادور على منتج يخفف من شكل الجلد المحبب او اللي يكون فيه شعر تحت الجلد .. هالكريم ممتاااااااز خفف لي هالمشكة بشكل واضح .. سعره شوي غالي على حجمه الصغير ٢١٠ يمكن 
بس تستخدمينه كل يوم .. انا مو يوميا افضل استخدمه بعد الشاور وخصوصي اذا سويت سكراب للجسم عشان تكون المسامات مفتتوحة بس ممتاز جدا .. وانصح فيه .

- كريم للجسم بالشيا من كلارنس ، من كثر حبي له مااستخدمه وايد ممتااااااز ، ترطيب جميل جدا واللبشرة تتشربة بشكل حلو والترطيب بدوم لفترة طويلة .. 

- زبدة للجسم من ماركة وش مااعرف وين ممكن الاقيها للاسف الشديد بس حبيته وكتبت عنه اكثر هنااا 

- كريم للجسم هالماركة مااعرفها بس وصلت لي فيه علبة ، ترتطيب حلو ووسط بس الريحة اجمللل شوي سويت بس المكس هذا كله جدا حلو .. مااعرف وين ممكن الاقي هالماركة .

...


- مقشر للوجة من سيام بالعسل ، انا مااحب اي شي فيه عسل بس هالمقشر ممتاز استخدمته لجسم مو لوجهي لاني مااحب ريحه العسل ، تاخذين منه شوي وتخلطينه مع الماي وبعدها قشري كل جسمك فيه ، ممتاااااز لانه بشيل الجلد الميت . حبيته ..

- مقشر لليدين خلصته وعجبني بصراحة  وكتبت عنه بشكل اوسع هناااا

...


- زيت للاظافر من ايسينس ، جدا حلو هذي ٢ او ٣ علبة اخلصها ، يرطب الجلد ووسعره رخييييص 

- معقم لليدين حلو مو قوي على البشرة ..

- ديودرنت من فا ، ماحبيته ولا حبيت ريحته قويه جدا ريحة عطر .
- ديودرنت من ريكسونا ولا ارررروع مااستغني عنه ابدا دايما اشترية ولا اغير عنه . 

...


- صابونة للجسم من لوكستيان بريحة الياسمين ، حبيتها الريحة تملي الحماام جدا اعجبتني .. 

- سامبل عينة لكريم للجسم من سسلي ، الريحة قوية قوية قوية لانه العطر ماشاء الله معروف بثباته حتى الكريم مع انه عينة ثبات الريحة لليوم الثاني اشمها بجسمي .. 

- عدسات جونسن احلى عدسات مريحة جدا وتدخل اكسجين للعين جدا حلوه وممتازة ..

..

العطور 


- عطر للشنطة بريحة المسك من مسك النخبة اعشششقة .. ودايما اشتري منه .

- عطر للجسم من تيد بيكر جدا حلو خلصت الحجم الصغير ،عندي الحجم الاكبر جدا حلو للبيت .

- شمعة Red من باث اند بودي، اعجبتني ، وممكن ارجع اشتريها مره ثانية ..

- عطر بخاخ للجسم من باث اند بودي  هالريحة حلوه للي يحب ال
عنبر شوي سويت بس حلوه للبيت ..

...


وخلصت كذا شغلة صغيرة مخلط ، مسك وعطور منوعة سامبلز ..

وبس هذا كله اللي خلصته في هالشهرين والحمدلله حققت الرقم اللي ابيه وان شاء الله استمر 
وموضوع شهر ٥ و٦ ان شاء الله قريب قبل العيد لانه عندي اشياء خلصتها وابي اكتب عنها قبل شهر ٧ لانه وايد 

..

السبت، 4 يونيو 2016

Project Pan All L'occitane \ Update 1



Project Pan All L'occitane \ Update 1 



السلام عليكم 


اشتقت للكتابة !! وادري اني مقصرة في حق المدونة لكن كل شي راح يتغير باذن الله للافضل 

اذا تذكرون من شهر بالضبط نزلت موضوع عن كل منتجات لوكستيان اللي عندي وقلت اني راح استخدمها كلها
قد مااقدر لمده ٣ شهور و النتيجة باذن الله راح تكون بتاريخ ٩ - ٨ 

وان شاء الله اكون حققت هدفي  اللي ماشاف الموضوع ممكن من هنااااا 

هم ٤٩ منتج منتوعة بين الاحجام العادية والوسط والعينات ، ف بديت ب اصغر الاشياء وكملت على الاشياء اللي انا كنت اصلا استخدمها .. ولله الحمد خلصت ١٤ منتج .. ورقم جدا جميل و راضيه عنه 

ومثل ماوعدتكم كل منتج اخلصه بكتب رائي فيه بشكل كامل 

...


IMMORTELLE ESSENTIAL WATER|مياه الخلود الأساسيّة

تونر للبشرة استخدمه بعد مااغسل وجهي يشكل كل بقايا الميك اب والاوساخ اللي بقت .. استخدمه يوميا الصبح والمساء
تونر خالي من الكحول .. مفعوله حلو وخفيف علي البشرة .. 

هل برجع اشترية ؟ لا لانه عادي جدا واستخدمت الاحلى منه .. صح ينظف وينقى البشرة بس مو وااااو .. 

عطر FOLIE FLORALE من زهر الكرز
جميل وخفيف عجبني جدا للصباح وللبيت بعد الشاور .. ناعم جدا ولا يزعج .. 

هل برجع اشترية ؟ ممكن ليش لا .. بس حاليا لا عندي عطور وابي استخدمها قبل مااشتري شي ..

...


مجموعة VERBENA

عندي منها كريم الايدين - شاور جل - لوشن - وصابونه صغيرة وصابونة كبيرة ..

خلصت كريم الايدين و شاور جل واحد .. و ٢ لوشن .. بصراحة كنت احب ريحه المجموعة بس يوم استخدمتها كلها مع بعض، بديت اصدع من قوة الريحة خصوصي اللوشن ، اما الصابون والشاور جل عادي ممكن ارجع اشتري منه لانه منعش وحلوه الريحة بالحمام .. 

باقي لي من هالمجموعة " صابونة على شكل ورقة وحاليا استخدمها - صابونه كبيرة - شاور جل استخدمه حاليا " 

وعندي ملاحظة على العلبة قاسية وماتقدرين تضغطين عليها عشان يطلع الكريم ف تعبتني شوي ..

....


SHEA BUTTER BODY LOTION || لوشن الجسم بزبدة الشيا

هذا اللي اقول ويني عنه من زمااااان .. مرطب للجسم فيه زبدة الشيا بنسبة ١٥ بالمية ، ترطيبة جدا حلو ، والجسم يتشربة ويبقى مترطب .. وفيه ريحة خفيفة نفس ريحة زبدة الشيا العادية اللي عندهم 

هذا لازم ارجع اشترية .. 

SHEA BUTTER LIP BALM STICK||إصبع بلسم الشّفاه من زبدة الشيا

مرطب للشفايف ، هذا كله زبدة شيا بالكامل ، يعتبر مرطب ثقيل بس ساعات احبه وساعات لا 
لانه بعض الاوقات تكون شفايفي متقشرة بحكم التقويم بس مايرطبها لي بالشكل اللي احبه 
ف مااتوقع اني برجع اشترية ..

- سامبل كريم للوجة بالشيا 

هذا للبشرة الجافة جدا ، ثقيل وصج يرطب واحسه ممتاز للي بشرتها جدا جافة او تستخدم الروكاتان ..
بس لي كان وايد ثقيل كنت احط منه نتفة على وجهي على المناطق الجافة فقط .. 

مااتوقع اشترية لانه ترتطيبة قوي ومايناسب بشرتي 

..


شامبو وبسلم من مجموعة مصحّح للشّعر الجاف والمتضرّر

انا جربت من قبل الشامبو والبلسم بس ك سابل وعجبوني 
بس يوم استخدمت هالعينات الوسط ، يعني بصراحة صح الشامبو ينظف الشعر زين بس ماادري فيه شي ماحبيته ، لانه فيه زيوت ف كان شوي يدهن شعري اسرع بحكم انه شعري اصلا دهني .. بس البلسم جدا جدا حلو .. 

ممكن ارجع اشتري بس البلسم .. 

...


- كريم مرطب للوجه .

دورت عنه اكثر اب اشوف الحجم الكبير بس مالقيته يمكن شالوه ونزلوا بدالة اللي فوق العينة اللي قلت لكم انه يناسب البشرة الجافة اكثر .. نفس التركيبة و الريحة .. ك تركطيب بطل بس مايناسبني انا .. بس جدا حلو للبشرات الجافة جدا ..

كريم مهدئ للوجه بزبدة الشيا

كريم للوجه فيه نسبة الشيا ٥ بالمية ، ويعتبر مرطب جدا ممتاز ، استخدمته اكثر شي في وقت كان فيه جونا ابرد من الحين 
لكن يوم بدا الجو يصير حار احتجت اغير المرطب .. بس هالمنتج كترطيب جدا جدا حلو وتحتاجين كمية بسيطه جدا منه ويرطب كل الوجه .. راح يناسب البشرات الجافة اكثر .. انا بشرتي مختلطة الى جافة .. بس عن التي زون بشرتي تدهن اكثر اذا حطيته .. ف صرت احطه بالاماكن الجافة بس واصلا كان فيه شوي لاني كنت استخدمه اغلبة من قبل 

بس انصح فيه اكثر للبشرات الجافة .. واصلا هالمجموعة الجديدة واااايد حلوه للبشرات الجافة 


....

وهذي هي المنتجات اللي خلصتها خلال شهر من منتجات لوكستيان .. راح ننتظر الشهر الجاي ونشوف شنو خلصت 
خصوصي انه اغلب الاشياء الصغيرة خلصت .. وراح نبدا بالمنتجات اللي بالجحم الاكبر .. بس ماعليه تحدي جميل 

نستخدم كل المنتجات اللي عندنا ونعرف فعلا اذا كانت تعجبنا او لا عشان نعيد شرائها ..

كانوا ٤٩ منتج - خلصت ١٤ منتج = والباقي ٣٥ منتج .. 


واللي يحب يجرب منتجات لوكستيان ترى عندهم موقع الكتروني ويوصلون لكم 
والدفع عند الاستلام 

                                        موقع لوكستيان الالكتروني