Wednesday, 16 August 2017

مجموعة عطور سطور من الرصاصي


مجموعة عطور سطور من الرصاصي 


السلام عليكم 



العطور كلنا نحبها ونستتخدمها بشكل يومي ولاكثر من مره ، في كل مره نشتري فيها عطر جديد نبحث عن الافضل والمميز

في جولة على دور العطور لفتتني مجموعة جديدة من محل الرصاصي العريق 
هالمحل اللي بدون مبالغة كل بخورنا اليومي منه .. تعودنا عليه من الصغر خصوصي محلهم اللي في سوق الذهب 

...



عندهم مجموعة جديدة من العطور اسمها سطور مستوحاه من الخط العربي 

حبيت هذا التوجه الجديد خصوصي اننا عرب ونحب اي شيء فيه خط عربي ، لانه يكون مميز 

المجموعة تناسب الرجال والنساء، ٤ عطور كل عطر يحمل حرف من كلمة سطور 

سين طاه واو راء

حبيت تصميم العلب ، بسيط انيق 
....



 س

عطر صباحي بارد وبنفس الوقت هادي ، ثباته حلو من ٣ - ٤ ساعات ، وطبعا ثباته علي الجسم وايد حلو
من العطور اللي حبيتها .. واذا خلصته برجع اشتري منه .. العطر من مكوناته الفواكة بس ابدا ابدا ماتشمونها الريحة جميلة وهادية .. 

نوتات العطر :
العليا : كمثرى و جوافة 
الوسطى: ورد
القاعدة : زهرة البرتقال 

احب العطور اللي تذخل في مكوناتها زهرة البرتقال ، تجذبني شخصيا .. 


...



ط

من العطور اللي تحتوي شوي على البهارات ، داخلة بطريقة حلوه، من المكونات الهيل والفلفل الوردي 
بس القاعدة عنبر وخشب الارز  

احب العطور اللي فيها عنبر بس بهذا العطر ماتشمين ريحه العنبر بشكل واضح خصوصي مع البهارات والهيل 
العطر من المكونات تحسين انها قوي ومسائي .. لا بالعكس العطر فيه انتعاش ، التركيبة تتوقينها برائحة مختلفة بس النتيجة جميلة .. على الملابس تحسين بريحة الانتعاش مع البهارات ، بس على الجسم تبين ريحة العنبر اكثر 

...



و 

من العطور اللي شخصيا حبيتها حبيتها وعلى ذوقي بالضبط 

العطر فيه عود و مزيج من الاخشاب ، الصندل ،الارز خشب الغاياك الدخاني ، العطر راقي مسائي 
حلو للمناسبات الاعياد .. هالعطر مع شوي دهن عود وبخور ياسلام 

من العطور اللي ارجع اشتريها ، احب هالنوع من العطور 

...


ر

هالعطر اول ماشميته حسيته شوي رجالي وغريب شوي .. لكن من العطور اللي غيرت رائي فيها تمااااما 

اول مره اشم هالمزيج وعطر غريب شوي ، ابدا ابدا لا تحكمين عليه من اول رشه .. خليه ياخذ وقته 
وراح تتغير الريحة .. مزيج من الزهور ومع مريج من الحمضيات ، ليمون .. وشوي شوي تطلع لنا ريحة الياسمين 

توليفه المكونات في البداية قلت ماعجبني ابدا ، بس غيرت رائي فيه تماااااما .. استخدمته كذا مره علي الملابس والجسم وايد وايد غير عجبني .. تحتاجين وقت بس عشان تفهمين العطر 


...



المجموعة جميلة وحبيتها من الرصاصي ، متوفرة في جميع فروع محلات الرصاصي في الامارات والخليج عندهم ١٦٥ فرع

العطر ١٠٠ مل وسعر العطر الواحد ب ١٥٠ درهم 

Tuesday, 8 August 2017

The Other Side Of Me || جانب مختلف من حياتي


السلام عليكم


كل شخص في هذي الدنيا يحب يشارك الناس بالاشياء اللي يحبها ، بس دايما فيه جوانب مخفية في حياته
مايشوفها الا المقربين جدا او ممكن يحتفظ فيها لنفسه ..

و ك مدونة اكتب عن الاشياء اللي احبها ، فيه جوانب من حياتي ماشاركت فيها الناس .. واليوم بشاركم ب ١٠ اشياء افضلها واحبها لهذي الفترة .. وطبعا هالموضوع الجميل تعاونت فيه مع مجموعة بنات مثل العسل .. اخترتا اننا نحطة اليوم بتاريخ مميز ٨/٨ ..  راح احط الروابط تحت عشان تقدرون تشوفون اختياراتهم ..

 كل وحدة بتكتب عن مفضلاتها لهذي الفترة بس بعيده تمام البعد عن المكياج و العناية .. شي يحمس لاننا كلنا يجمعنا حب المكياج والعناية

ف موضوع حلو ، ومتحمسة جدا اشوف اختيارات البنات خصوصي اني اتابعهم كلهم من الاول .. البنات مبدعات ماشاء الله .. ويستاهلون المتابعة دايما 


....

نبدأ بالالكترونيات :



أول وأهم شي ، الحب الحب الحب جهاز ال  i MAC ، هذا الجهاز الجميل كان على رأس قائمة احلامي
والحمدلله حققت هالشيء في رمضان .. الجاهز جميل مريح في الاستخدام ، ممتاز للشغل و الترفية " يوتيوب ، افلام ، مسلسلات " بالنسبة لي هذا التلفزيون الخاص فيني ..

كل يوم كنت اقول شلون كنت اشوف واستمتع بالابتوب مع انه اللي عندي كان ومازال ممتاز عندي ماك برو القديم بس احبه جدا لانه بديت المدونة فيه ..

خلال استخدامي للجهاز خلال هالفترة ريحني من شيين كنت اعاني منهم .. عيوني و رقبتي

كنت دايما اركز اكثر في الابتوب لانه شوي حجمه اصغر ، ودايما كنت اغمض واركز اكثر بالكلام ، ف حاليا اريح لاني اشوف بشكل اكبر ..

والشي الثاني رقبتي ، طول المدة اللي نشتغل فيها على الابتوب يكون الراس نازل شوي و الرقبة مايلة للامام ، وهالشي متعب لفترة طويلة .. وكنت دايما اشتكي من الم في الرقبة ومهما احط كريم او اروح لجلسات مساج يخف الالم بس يرجع ، وهالشي اذا تكرر لفترة طويلة يسبب لي صداع .. وانا للاسف معاي صداع نصفي ف الالم يزيد بشكل مضاعف

الحمدلله يارب على هالشيء .. بس طبعا الجلسة الطويلة في المكتب متعبة بس الافضل الحركة كل ساعة لمدة ٥ دقايق عشان الجسم مايتعب ...


الشي الثاني صغير في حجمه لكن كبير في اداءة ، ذاكرة او ميموري الكاميرا بس واي فاي



هالشي اذا ماكان عندج وانتي مصورة ف اسمحي لي وينج عنه ، راحه مابعدها راحه ، الميموري هو نفسه بس فيه اضافة نقل الصور عن طريق الواي فاي ، اسهل شي وانتي تصورين بنفس الوقت .. عن نفسي احبها لاني اصور واشوف النتيجة بنفس الوقت على الجهاز ، اتاكد من وضوح الصورة ، وضوح الكلام والتفاصيل الصغيرة ، لانه كم مره اصور شي وبعد مااخلص التصوير اكتشف فيه شي مو حلو او ماحبيت الاضاءة او غيره ، ف هالشي يساعدني جدا .. وبنفس الوقت اخلص تصوير و انقل الصور بنفس الوقت .. واكون وقتها انا ارجع كل شي لمكانه ونقل الصور خلص ..

حطيت بالصوره نوعين استخدمتهم .. افضل شي اللي لونها برتقالي ممتازة

المميزات اللي فيها انها تقل لج الصور لاي جهاز سواء كمبيوتر - لابتوب - ايباد- موبايل ، وهالشي حلو يناسب احتياجك ..


الجهاز الثالث



جهاز القهوة ، القهوة من مفضلاتي في الحياااااااة  " نفس النكهة، اللون والروتين ومع ذلك لانملها ، هكذا هي الاشياء عندما نحبها " لانملها" "

القهوة تغير مزاجي بالكامل ، ايه انا من هالناس ماافهم ولا استوعب بشكل جيد اذا ماشربت قهوه ويظل مزاجي متعكر ، بس بعد مااخلص الكوب اتحول اي شخص اخر سعيد محب للحياة و انجز الكثيييير من الامور ..



في شهر ١١ راح اكمل سنة من شريت الجهاز ولا ندمت ابدا على هالشي ، وقع اختياري على نسبريسو لاني افضل اني كل مره اشرب قهوه بنكهة لذيذة واللي يحب القهوه راح يعرف انه كل تحميصة قهوه تختلف بالطعم والرائحة .. لاني احب قهوتي سودا بدون سكر وبدون حليب ف اعرف تحميص القهوه الصح .. ف هالجهاز قدم لي اللي احتاجه وفضلته عن ماركات ثانية .. والجهاز ممتاز معاي ولله الحمد .. افكر اسوي تدوينة كاملة عنه ..

وبتكلم بشكل سريع عن افضل ٤ انواع بالنسبة لي ..



ENVIVO LUNGO 
FORTISSIO LUNGO اول ٢ احبهم واشربهم في اي وقت الصباح او غيره
ROSABAYA DE COLOMBIA افضل اشربها اذا ابي شي خفيف لانها خفيفة 
ROMA لذيذة وتصصح ، اخذها اذا فعلا ابي شي يفتح مخي .. وفيه انواع ثانية بس غالبا اخذ هالاربعة الا اذا نزل شي حصري ولذيذ عاد اخذ بكمية كبيرة اذا حبيت الطعم ..


و نصيحة دايما استغلوا وقت التنزيلات اللي حابه تشتري جهاز قهوة مثلا محل نسبريسو دايما في شهر ١١ ينزلون اسعار الاجهزة الى النص !
...



طبعا مع القهوة لازم ناكل شي لذيذ معاها .. انا اعشق الككاو بس يوم يجتمع الككاو مع البسكوت امممم الطعم لذيذ جدا
احب هالنوع واااايد لانه قطعة كاملة من الككاو اقدر هالشي جدا .. ف احساس جميل قطعة ككاو محاطة ب بسكوت لذيذ
وهالنوع احب اكله اذا كنت جوعانه لانه مشبع ..



السناك الثاني ، اعشقه وكل فترة ارجع اشتريه لانه ادمااااااااان
لوز مغطى ب عسل ومحمص يمي يمي يمي ، احب اللوز واحب انه فيه شوي سكر ومحمص ف مقرمش وطعمه لذيذ جدا
احاول مااشترية دايما لاني اخلصه بسرعه من لذته ..



....




انا اعشق الاحذية بس مو كل كعب او شوز يكون مريح ، اذا كنت ابي شي مريح وعملي وممتاز ل سفر او لطلعة يومية على طول يكون اختياري ل محل ناتشراليزر naturalizer ، اشتريت منه عدد كبير جدا ومازلت اشتري لاني ارتاح فيهم
سواء الفلات او الكعب .. يعني الكعب عندهم مريح واقدر امشي فيه بالمول مثلا ومع ذلك انيق ومرتب .. وترى عندهم اشياء تناسب السهرات .. بس مو دايما متوفرين .. واسعارهم ممتازة من ١٩٨ الى ال ٤٠٠ الا شوي

وافضل اخذ كذا شي بوقت التنزيلات لانه يفرق السعر جدا ، فيه اشياء توصل الى ٩٩ درهم .. هذا اخر شي شريته منهم
عملي ومريح جدا وفيه شوي كعب احبه لشي شبه يومي ..

انصح فيهم وبشدة ..

...



البجايم عطوني بنت ماتحبها ، مااتوقع فيه وحده ماتحبهم وعندها هوس تجميع .. انا عن نفسي مدمنة بجايم اشتري واحبهم واعيش فيهم ...

من فترة طحت على محل جميل جدا اسمه أنابيل  Annabelle ، لفنتي اول شي تصاميمهم حلوه وبسيطة .. بس اكثر شي احبه فيهم القماش والخامة المستخدمة ممتااازة وناعمة وبااااااردة في نفس الوقت ... أفضل هالشي جدا واسعارهم حلوه يعني ٥٥- ١٢٠ درهم 
موجودين في مردف سيتي سنتر ودبي فستيفال مول

...

نروح لشي مفضل ثاني ، وشاركت البنات فيه على سناب شات .. كارتون حكايات آن



ماشفته من قبل ولا كنت اعرف عنه شيء ، بس من اجمل القصص اللي مرت علي الكارتون من رواية Before Green Gables ، صدرت في ٢٠٠٨ وبعدها ب سنة بدا عرض الكارتون ٢٠٠٩ ،  تدور احداث المسلسل في كندا حول فتاة صغيرة تدعى آن شيرلي، تصبح يتيمة الأبوين وهي طفلة رضيعة، يتبناها رجل يدعى بيرد توماس وزوجته جوانا توماس. تعيش آن مع هذه العائله الفقيرة لعدة سنين، واثناء السنين هذه تحصل احداث مشوقة ،وتغيرات كثيرة في حياة الصغيرة آن.



الكارتون له جزئيين الاول حكايات آن ، والثاني شما في البراري الخضراء 





الجزء الاول جميل جدا عن طفولة آن و بتلاحظون انه الدبلجة جميلة وثرية بالكلمات ، اما الجزء الثاني اللي يتكلم عنها وهي في عمر المراهقة مختلف وراح تختلف كل اسامي الشخصيات وصارت آن شما ... 



الكارتون يستحق المشاهدة جميل جميل جميل 



....






واخر شي في يومي .. اسكر كل شي كل جهاز عندي ، اسكر كل الاضاءة .. اولع شمعتي
واخذ دفتري وقلمي .. واكتب ... كل شي يكون في بالي اكتبه .. فكرة موضوع او اتصال بشخص .. عندي موعد وغيره من الامور ... هالشي يخليني انام مرتاحه لاني اطلع كل الافكار اللي في عقلي واخليها على الورق .. وهالشي يصفي مخي وبالي عن التفكير ، وبعد راح يساعدني على تحقيق بعض الاشياء اللي كتبتها ..

هذي الطريقة واااايد ريحتني وصرت اخطط صح ليومي وانجز كل الامور اللي تكون في عقلي واللي ناويه اسويها بس ماوصل لها الدور او اني اكون اجلتها لسبب ما ..


وبس هذي كل الاشياء اللي احبها هذي الفترة ، حبيت اني ارجع اكتب عن اشياء شوي بعيدة عن المكياج والعناية
ليش لا ممكن اني كل فترة اكتب عن موضوع  ..

متحمسة اشوف اختيارات البنات واكيد انتوا بعد ..

هذي روابط مدوناتهم وبعض المبدعات نقلوا لنا مفضلاتهم بس باليوتيوب

الجميلة دائما أمل : http://terter-thinks.blogspot.ae
الجميلة دائما غادة : http://ghadaabdullah09.blogspot.ae
الجميلة دائما رغد : http://rorobeauty.blogspot.ae
الجميلة دائما المها: http://almahabeauty.blogspot.ae
الجميلة دائما اشوق : http://www.triangleash.com
الجميلة دائما بيان :https://www.youtube.com
الجميلة دائما نورة : https://www.youtube.com
الجميلة دائما مروة :https://www.youtube.com

...


Saturday, 22 July 2017

Ultra Doux Oil Blends Remedies || مزيج الزيوت المعالجة بزيت الزيتون والأملا من غارنيية


Ultra Doux Oil Blends Remedies || مزيج الزيوت المعالجة بزيت الزيتون والأملا من غارنيية 



السلام عليكم 

كل وحدة تحب تعتني بشعرها قد ماتقدر وساعات هالشي يكون مكلف للبعض ، بس العناية مهمه طبعا 
ف اخترت لكم منتج جميل جدا وفادني في عنايتي لشعري و سعره جدا مناسب .. 

الزيت هذا فيه منه ٣ انواع : - زيت الافوكادو والشيا ، مناسب للشعر الجاف جدا او الاجعد 
                                  - زيت الزيتون والاملا ، مناسب للشعر الجاف بعمق والمتضرر
                                 - زيت الارغان و الكاميليا ، مناسب للشعر الجاف والباهت 

مزيج الزيوت المعالجة بزيت والزيتون الأملا من غارنييه ، هالزيت واايد حبيته وناسب شعري ولله الحمد 
الزيت طبعا هو مزيج ل نوعين من الزيوت الاول زيت الزيتون والثاني زيت الأملا للشعر ومعروفة نبتة الأملا بفوايدها 

الزيت الحلو فيه انه غير دبق او لزج وهالشي وايد احبه في اي زيت استخدمه عشان يكون سهل وانتي تحطينه وسهل بعد لغسيل الشعر بعد الاستخدام .. 

والحلو بعد انه العلبة سهله في الاستخدام خصوصي لانه الراس العلبة يسهل انج تحطين الزيت على كامل فروة الراس .. 

طريقة استخدامه : 
ترجين العلبة بشكل جيد عشان الزيوت تختلط مع بعض ، لانها تنفصل ،  تحطينه الزيت على كامل شعرك مع شويه تدليك عشان يتغلغل لكل الشعر ، وخليه للمده اللي انتي حابتها 
بالنسبة لي ساعة تكفي .. وبعدها اغسل شعري .. 
وافضل طريقة لغسل اي زيت من الشعر ، تاخذين شامبو شوي في البداية مع نتفة من الماي وتفركين شعرك فيه وبعدين بللية بالكامل بالماي 
اسهل واسرع لانه لو غسلتي شعرك بالطريقة المعتادة اصعب خصوصي انه الزيت مايطلع بسرعه مع الماي ، لازم شامبو شوي اول ..

رائي فيه : 

عجبني جدا يرطب الشعر ، ويخفف من النفشة شوي ، انا شعري ويفي ف ناسبني جدا لانه رتب لي الخصل وخلى شكلها أجمل ، والميزة الثانية انه مايثقل الشعر خصوصي للي شعرهم دهني نفس حالتي .. 

ف انصح فيه .. 

سعر الزيت = ١٨ درهم فقط ، وموجود في كل السوبرماركت الجمعية التعاونية ، كارفور وغيره 

Monday, 12 June 2017


مقشر القهوة من liliums


أنا من عشاااق القهوة ☕️ ف يوم اشوف منتج فيه قهوة ابدا ابدا مااتردد في استخدامه 💕💕

منتج اليوم سكراب بالقهوة منتج جديد من حساب @liliums_💕
الله يوفقهم يارب 💕


السكراب هو مزيج السكر - قهوة - مجموعة زيوت ، بالاضافة الى فيتامين C & E ✨
و مجموعة الزيوت تتكون من " زيت اللوز - زيت جنين القمح - زيت الزنجبيل - زيت الورد - زيت الليمون " ✨


حبيبات القهوة شوي اخشن و اكبر " غير عن اللي متعودين عليه " بس شي حلو لانه يساعدج بالتقشير وماتذوب المكونات بسرعه ف تأخذين راحتج و وقتج بالسكراب 💕👍🏻 .
.
ماشاء الله كمية الزيت راهيه ، ترطب الجسم بشكل ممتاااااز 💕👍🏻
وبعد حجم المقشر نفسه راهي ويكفي لمدة طويلة 👍🏻💕







رائي في المنتج : 😍
حبيته حبيته 😍😍😍😍، التقشير جدا جدا جميل يقشر الجسم بشكل حلو جدا بس بدون مايجرحه 👍🏻 اذا كان فيه شعر تحت الجلد بعد يطلع بعد التقشير 👍🏻👍🏻👍🏻
يشيل الجلد الميت .. ويخلي الجسم ناعم ورطب خصوصي مع الزيت اللي فيه 💕


مع الاستخدام المستمر راح تشوفين الفرق اكثر في النعومة والترطيب .. واذا جسمك فيه تصبغات ممكن تخف تدريجيا مع الاستخدام .. .




ريحة المنتج 💕 في الاول يعني تشمون ريحة القهوه بس تحسون فيه ريحة مع القهوه 💕💕 بعدين تطلع ريحة البيبي باودر 😍😍😍 ومزيج حلو بين الروايح ، لاني احبهم 😍


نصيحة اخيرة : حاولي انه الماي مايدخل للمقشر عشان مايخترب 
آخذي لج شوي في علبة واستخدميها 💕 💕


هذا حساب صاحبة مقشر القهوة 

Wednesday, 7 June 2017

Lancome Grandiose EXTREME || ماسكرا لانكوم


Lancome Grandiose EXTREME || ماسكرا لانكوم



السلام عليكم 

ماسكرا لانكوم Grandiose Extreme 
أفضل ماسكرا جربتها لحد الحين من مفضلاتي 💕😍💕😍
.
.
فيه نوعين من هالماسكرا هذا النوع الجديد واللي العلبة الخارجية تكون باللون الأسود المطفي .
.

تعطي كثافة للرموش بشكل جدا حلو تطلع لك رموش حتى لو رموشك قصيرة 💕 وتعطي طول بعد ، انا رموشي تعبر طويلة ودايما ادور على الماسكرات اللي تعطي حجم 💕 



الفرشة بروحها قصة ثانية لانه اولا شكلها شوي غير تقدرين تستخدمينها وتعكسين الفرشة لأطراف الرموش فتعطي شكل الرموش كأنها مسحوبة ، بس ممتازة توصل لكل رمش بالعين .. الحلو فيها بعد انها توصل لمنبت الرموش بدون ماتاذي العين 💕 





ثباتها جدا جدا عااااالي 👍🏻 ، ماتتناثر على الخدود بعد فترة 👍🏻
سوادها قوي ومطفي 👍🏻👍🏻
عيني ماحسست منها ، وممتازة مع العدسات ماتطبع عليها .. .
.
نصيحة 💡 اول ماتشترينها خليها لمده أسبوع وبعدها أبدي استخدميها ، النتيجة راح أفضل 👍🏻
.
.
🔻 الشي السلبي شوي فيها 🔻
انها شوي متعبة في ازالتها ، تحتاج شوي وقت .. 💰 سعر الماسكرا = ١٩٥ درهم 💰 .
.

Wednesday, 24 May 2017

سوي بنفسك سكراب القهوة | DIY Coffee Scrub


سوي بنفسك سكراب القهوة | DIY Coffee Scrub




السلام عليكم 


القهوة انا من عشاقها وإدمان بالنسبة لي ، عندي جهاز نسبريسو وعندي نوع من الكبسولات ماحبيت طعمها
للاسف الشديد ، ف خطرت في بالي فكرة اني اسوي منها سكراب القهوة للجسم 



بدال ما اتخلص منها ومافيه احد راح يشربها 

...

الاشياء اللي نحتاجها : 
قهوه " انا استخدمت الكبسولات " بس ممكن اي بن قهوة تطحنينها تستخدمينه ، سكر ، واي نوع من زيوت الجسم 
واذا عندج زبدة شيا او زبدة جوز الهند بعد ممتازة .. 

للسكر انا استخدمت كوب كامل ، احب السكراب يكون خشن شوي 

علبة نحط فيها السكراب بعد ماننتهي وهي نفس العلبة اللي خلطت فيها كل المكونات ، استخدمت علبة فاضية لشمعة 

...

اول شي حطيت القهوة بعد ماطلعتها من الكبسولات 



والسكر 

والزيت ، انا استخدمت زيت الأرغان  


وحطيت شوي من زبدة الشيا 

...

خلطت كل المكونات مع بعض ، وانتي ممكن تسوينه على حسب انتي شو حابه ، تبين شوي خفيف مافيه سكر وايد
او بسكر اكثر ، او جاف اكثر مايكون فيه زيت وايد ، انتي واللي تحبينه و تفضلينه

انا احبه خشن فيه سكر اكثر وفيه زيت اكثر عشان يرطب جسمي بنفس الوقت  


وهذا شكله ، وايد حبيته ، يقشر الجسم ويرطبه ، والاحلى ريحته قهوة 



وعادي تقدرين تحفظينه عندك ، استخدميه وتدلعي .