October Empties 2015 | أشياء خلصتها في اكتوبر ٢٠١٥
السلام عليكم
من زمان عن موضوعي الجميل ، اكتشفت اني ماسويته من شهر ٦ قبل رمضان
وعندي اشياء خلصتها وخلاص ابي ارميها ..
بكل صراحة تمنيت اني خلصت اكثر خصوصي انه تقريبا مرت ٤ شهور بس شوي
كنت مشتته ، استعمل شي واخليه وابدا بشي ثاني جديد ..
بصراحه مااحب هالشي بس ناوية نيييه اني اخلص كل شي مفتوح وباقي فيه شوي
وابدا استخدم السامبلز اللي عندي ، لانه وايد وصار لهم درج صغير مخصص لهم وهالشي ماابيه ابدا
..
نبدا باشياء الشعر ، من اليمين :
- كريم للشعر من غارنيية حلو ، ممكن اشتريه مره ثانية ، وسويت له ريفيو هنا
- كريم وسيروم للشعر المتقصف من Alterna خلصته كله بس ماشفت اي فرق كان ومازال فيه تقصف بشعري لين خلصته ، التقصف ماراح الا يوم قصيت شعري .
- دراي شامبو من بتيست ، حلو واحب هالنوع ، هذا ريحته حيل حلوه .. يس ممكن ارجع اشتري منه بس موالحين لاني عندي حاليا ..
- بديل الزيت من رويال ، هالشي اللي ويني عنه من زمااااان جميل جميل جميل جدا جدا ، احطه قبل او اثناء الشعر
يرطب شعري حيييل ، انا شعري ناشف وجاف من الاطراف ، وهذا ممتااااز يرطب لي هالجفاف كله ..
..
نروح لاشياء الجسم
- زيت الارغان من بودي شوب ، احببببه جدا ترطيب سريع والبشرة بسرعة تتشربه ، انا احب اخلطة مع الزبدة او اي كريم للجسم عشان يزيد الترطيب .
- بودرة جونسن ، اعشقها ، اصلا منو مايحبها .
- مقشر الجسم من siam Natural ،جمييييل جدا جدا ، ومن صج ينظف الجسم ، سويت عنه ريفيو كامل على الانستقرام
- واقي من الشمس للجسم من هاوايان ، عادي جدا وماحبيته لانه ريحته كلش موحلوه بزبدة الكاكاو ، مااحب ريحتها ابدا ..
...
- مقشر للوجة حبيته وخلصته كله ، ينظف ويقشر الوجة بشكل جميييل ويترك الوجة ناعم ، كتبت عنه ريفيو من قبل ..
- شمعة بريحة ال Honeysuckle من باث اند بودي ، حلوه وقويه ريحتها تنتشر بالغرفة بسرعة وتظل لفترة طويلة ..
- مزيل للمناكير ، هالماركة حلووة ولا تنشف الاظافر ، وسعره رخيص ٤ او ٦ دراهم .
...
نوصل للعناية بالوجة
- واقي للشمس من لا راش بوزيه ، حلو ولا يترك اثر دهني او يخلي الوجة رمادي ، بس لازم ماتكونين حاطه قبلة مرطب للبشرة لانه راح يتقشر ويطله شكل الوجة متقشر وموحلو ابدا ..
- مزيل للميك اب من نوكس ، وكتبت عنه ريفو كامل
- تونر من ماركة شفا الاماراتية ، حيل حبيته ، كتبت عنه من قبل هنااا
- غسول للوجة من افينو ، راااااائع جدا ، لطيف وناعم جدا على البشرة ينظف ويرطب بنفس الوقت
كتبت عنه بشكل كامل في هالموضوع ..
- محلول للعدسات ، حبيته ، المهم انكم تتاكدون من تاريخ الصلاحية لانه ممكن ينتهي اذا ماتستخدمونه دائما ..
...
- Matricium من ماركة بايودريما ، هالشي مجدد لخلايا البشرة ، تستخدمين كل يوم امبولة وحدة وتخلصينها كاملة
العلبة هذي فيها ٥ حبات ، وهي علبة تجريبية فقط .. مالاحظت تغيير كبير بس فيه اماكن تقشر فيها الجلد
- سيروم من coverderm للعيون ، ممتااااز ويخفف الانتفاخ والهالات بس يحتاج فترة طويلة ، ويخفف التصبغات اللي حوالي العين .. اخذته من صيدلية بوتس ..
...
- كريم للوجة من urban veda ، كريم خفيف والبشرة تتشربة بشكل حلو ابدا مو ثقيل ، ريحته تهببببببل تهبل ، ودي لو فيه عطر نفس هالريحة الحلوه ..
- كريم للعيون من كودالي ، يناسب العيون والشفايف مع بعض ، خلصته كله بس ماحسيت باي نتيجة حلوه غير الترطيب
ف ماراح ارجع اشتريه مره ثانية ...
- كريم للعيون من مراد ، غالي على الفاضي خلصته وماشفت اي شي مع انه مناسب للهالات بس يرطب وبس ..
- جل ثقيل من ديرمالوجيكا ، barrier repair هالكريم عجييييييب عجيب عجيب ، يجدد البشرة احبه جدا ولا استغني عنه
كمية صغيرة منه يوميا تكفي للوجة مره وحدة .. يجدد ويشيل الجلد التراكم ويخلي الوجة حلوو ، هذا نصحتني فيه الاخصائية اللي تسوي لي الفيشل في ديرمالوجيكا هذا ثاني واحد اخلصه ..
- كريم bepanthen كتبت عنه بالانستقرام من قبل ، ممتاز للوجة والشفايف ، يرطب بشكل حلووو ومتتاز لقبل المكياج ، حلو اذا كانت بشرتك جافة جدا لانه يرطب من قللللب .. جربوه ولا راح تندمون ابدا ،كتبت عنه شوي في هالموضوع
...
- فيتامين E200 حلو للبشرة ، ممكن تستخدمونه بعد ل تحت العين اذا قصيتي الحبة تستخدمين الزيت .
- فيتامين الشعر والبشرة والاظافر تكلمت عنه من قبل واااايد وهذا موضوع كامل خاص فيه .
...
- كونسيلر Fake up من بينفت ماحبيته كلش ، وهذا كان عينه ..
- كحل سائل من ريفلون حلو واشتريته مرتين او ٣ .. سواده حلوو ..
- كونسيلر فل كفر من ميك اب فور ايفر ، ممتااااااز جدا ، وتغطيته قويه جدا ، حلو اذا كان عندك ممكن تخلطينه مع اساسك الخفيف ..
- ماسكرا من نوبا تعطي كثافة للرموش ، ماحبيتها وايد وتتكتتتل بشكل مو حلو ابد ..
- ماسكرا من برجوا ، حلوه وتعطي كثافة بس اذا كثرتي منها ممكن تكتل الرموش ..
- ماسكرا من ريميل كتبت عنها ريفيو كامل هناااا
هذي اشكال الفرش
...
هالاثنين ارسلوهم لي شركة للتجربة ، وهم مثل المكملات الغذائية بس شراب ، نوعين بس ماحبيتهم
من اشربهم جسمي كله يحبب وحبوب صغيرة وتحكني ، بس ماقدرت اكمله ابدا
موجودين بصيدلية بوتس
...
سامبلزززز
- شامبو وبلسم من لوكستيان مناسب للشعر الجاف والمتضرر ، عجبني جدا جدا الشامبو حلو وريحته حلوووه
والبلسم يرطب الشعر وتخليه ناعم .. عجبني بصراحه
- شاور كريم من سيفورا ، ممتاااز اللي يحب انه جسمه يكون مترطب هذا جدا ممتاز ، يترك الجسم ناعم ومترطب
- سيروم للوجة من لوكستيان ، جل لونه ودري ناعم على البشرة وعجبني .
- عينة واقي من الشمس عادي مافيه شي مميز .
...
- قطن من سيفورا ، جدددا حلو وعاجبني خلصت ٢ منه ، انصحكم فيه وسعره رخيص ب ٩ دراهم .
- كريم الايدين بالافندر من لوكستيان ، جميل جدا وانا اصلا احب كريمات الايدين منهم .
- عنية كريم للوجة من ديرما اي ، عجبني جدا وعندي بعد كذا عينة وان شاء الله اخلصهم .
- ماسك للعيون من ماركة كورية ، ممتازه جدا باااارد جدا علي العين و مع المداومة ممكن انه يبيض البشرة ، وترطيببببة رائع جدا ، عجبني وبرجع اطلب منه كمية حلوه ..
وبس هذا كل شي خلصته هالفترة اللي راحت ، وان شاء الله اداوم علي هالشي وكل فترة اكتب
هالموضوع اذا خلصت مجموعة حلوه
هالموضوع اذا خلصت مجموعة حلوه
ليست هناك تعليقات:
إرسال تعليق